Situatë e tensionuar në takimin e SBASHK-ut në Deçan
13:49
Situatë e tensionuar në takimin e SBASHK-ut në Deçan
Kryetari i Sindikatës në Deçan, Avdullah Lataj, ka thënë se do të presin takimin e orës 15:00 që e ka organizuar SBASHK-u, për të ardhur me një vendim përfundimtar se a do të ndërpritet greva ose jo.
Pas daljes së kryetarit të komunës se Deçanit, Bashkim Ramosaj, nga takimi me përfaqësues të SBASHK-ut në këtë komunë, ata kanë vazhduar mbledhjen me dyer të mbyllura.
Njëri nga ta ka thënë se situata është shumë e tensionuar dhe për këtë edhe nuk kanë lënë për të xhiruar.
12:52
Edhe në Deçan vazhdon greva e mësimdhënësve
Edhe në komunën e Deçanit është duke vazhduar greva e mësimdhënësve.
Pavarësisht thirrjeve nga zyrtarë të komunës së Deçanit për fillim të procesit mësimor, mësimdhënësit nuk e kanë përfillur atë, raporton KTV.
Po ashtu në orën 11:00 është mbajtur një takim me kryetarin e kësaj komune dhe përfaqësues të SBASHK-ut nga kjo komunë.
Ky takim është duke u mbajtur për arsye të arritjes së një marrëveshjeje për ndërprerje të grevës.
11:32
Komuna e Junikut s’fillon mësimin, janë në grevë
Në komunën e Junikut të hënën ka filluar greva e mësimdhënësve pasi që mësimi ishte shtyrë për shkak të motit të ftohtë.
Pavarësisht njoftimit të komunës së Junikut për fillimin e vitit shkollor, mësimdhënësit e shkollës fillore “Edmond Hoxha” kanë thënë se nuk do e ndërpresin grevën deri në ndryshim të vendimit, raporton KTV.
Më tutje, ata kanë thënë që kërkesat e tyre janë të realizueshme. Drejtori i arsimit në komunën e Junikut, Fatos Shala, ka thënë që pavarësisht që nuk e kanë përfillur kërkesën e tyre ata janë në vazhdimësi në bisedime me MASHT-in që të gjejnë një zgjidhje për fillimin e procesit mësimor.
Ai më tutje ka shtuar se do vazhdojnë të kërkojnë nga mësimdhënësit e kësaj komune që të mbahet mësimi, por pa ushtruar presion.
Pa marrë miratimin e mësimdhënëseve, Komuna e Junikut, dje ka thënë se mësimi në këtë Komunë do të nisë sot. Por këtë e ka përgënjeshtruar SBASHK-u.
