Sikur viteve të tjera, edhe këtë vit jemi të shtrënguar që me rastin e Ditës së Lirisë së Shtypit të ngremë zërin ndaj presioneve dhe kërcënimeve që na bëhen në punën tonë profesionale.
Sikur viteve të tjera, na duhet të theksojmë dështimin e institucioneve të shtetit që të sigurojnë se liria e medias respektohet nga ata që popullojnë këto institucione. Madje, në shumicën e rasteve, na duhet të reagojmë kundër krerëve të këtyre institucioneve, që shfrytëzojnë pozitat e tyre në pushtet për të ushtruar presion ndaj lirisë së fjalës dhe medias.
Mes 3 majit 2018 dhe këtij sot kemi pasur raste të bollshme që tregojnë se të pushtetshmit e Kosovës, krerë institucionesh e partish, por edhe vartës të tyre të niveleve të ndryshme nuk hezitojnë të ushtrojnë presion, kërcënime, e në raste të caktuara edhe të mësyjnë fizikisht kundër gazetarëve dhe medieve, që ua ekspozojnë të bëmat e këqija. Madje, vetë presidenti dhe kryeministri janë identifikuar në raporte ndërkombëtare si ushtrues presionesh ndaj medias.
Por, për dallim nga vitet e tjera, këtë vit na duhet të ngremë zërin edhe kundër Asociacionit të Gazetarëve të Kosovës, shoqatë kjo e cila do të duhej të mbronte të drejtat dhe liritë e gazetarëve, por që së fundi u bë vetë pjesë e presionit ndaj tyre.
Rasti në fjalë ka të bëjë me linçimin publik që AGK-ja ia bëri gazetares së Grupit KOHA, Saranda Ramaj, pas një raportimi krejt korrekt të saj nga një mbledhje e Këshillit Prokurorial të Kosovës. Kryesia e AGK-së, me kumtesën njollosëse dhe krejt të pavërtetë ndaj gazetares sonë, bëri atë që rëndom e bëjnë të pushtetshmit kur publikohet ndonjë informatë e pakëndshme për punën e tyre: sulmojnë gazetarin/gazetaren.
Për ne në Grupin KOHA, një gjë e tillë nuk ka qenë kurrë e tolerueshme prej askujt. Nuk mund të jetë as prej AGK-së.
Andaj, në atë që gjithkund shënohet si Dita e Lirisë së Shtypit, Grupi KOHA kërkon prej të gjitha institucioneve të pushtetit politik, partive në pushtet dhe opozitë, segmenteve ekonomike dhe shoqërisë në përgjithësi, dhe veçanërisht nga organizatat që pretendojnë se mbrojnë mediat dhe fjalën e lirë – përmbahuni nga sulmet. Nëse për asgjë tjetër, në rastin tonë - janë të kota.
Grupi KOHA – “Koha Ditore”, KTV, Koha.net
© KOHA. Të gjitha të drejtat janë të rezervuara.
