Mbledhja e Qeverisë së dorëhequr vlerësohet e panevojshme, nuk do të duhej të merrte vendime

Valbona Bytyqi 05 November 2019 19:12

Rreth një muaj pas mbajtjes së zgjedhjeve, kryeministri i dorëhequr, Ramush Haradinaj, ka mbledhur kabinetin e tij, për të miratuar disa vendime që lidhen me buxhetin e Kosovës.

Mbledhja e ministrave, derisa është duke u pritur certifikimi i rezultateve të zgjedhjeve të 6 tetorit, është duke u parë i paarsyeshëm nga njohës të ekonomisë dhe punës së qeverisë, raporton KTV.

Naim Gashi, ekonomist, thotë se Qeveria e dorëhequr do të duhej të ishte vetëm kujdestare e funksionimit të shtetit, e jo të merrte vendime që mund të ndikojnë në të ardhmen.

Një mbledhje e tillë, për Donika Eminin nga CiviKos, do të ishte e arsyeshme në rast të ndonjë situate emergjente.

Për dallim nga Gashi dhe Emini, analisti i politikave në Institutin GAP, Berat Thaçi, thotë se lëvizja e buxhetit mund të jetë e nevojshme.

Megjithatë, sipas Thaçit, Qeveria e udhëhequr nga Haradinaj nuk do të duhej të shfrytëzonte situatën e krijuar.

Në mbledhjen e 113-të me radhë, ekzekutivi i udhëhequr nga Haradinaj ka miratuar vendimin për kursimet dhe ndarjet buxhetore mes organizatave buxhetore për vitin 2019.

Ndër të tjera, në këtë takim të kabinetit qeveritar, është bërë e ditur, po ashtu, se brenda nëntë muajsh janë realizuar të hyra në vlerë prej 1 miliard e 676 milionë eurosh, ndërsa janë shpenzuar vetëm 269 milionë më pak, pra 1 miliard e 407 milionë euro.

© KOHA. Të gjitha të drejtat janë të rezervuara.

Komentet

Shto koment

Të ngjashme