Dy mediume të Grupit Koha, Koha.Net dhe TV Arta, këto ditë po festojnë 10-vjetorin e punës.
Për një dekadë, Koha.net informon lexuesit e saj në kohë reale me lajmet më të fundit nga vendi e bota, raporton KTV.
Pjesë e Koha.net-it, që nga themelimi, ishte Artan Krasniqi.
Krasniqi, i cili është redaktor në Koha.net, thotë se nuk ka qenë e lehtë të ruhen vlerat e gazetarisë në një ambient të rritjes së numrit të portaleve.
Punën në portal nuk e kishte të lehtë as gazetari Endrit Berisha, ndonëse thotë se besimin e lexuesve të Koha.net-it, nuk mund ta sfidojë asnjë prej mediave të tjera online.
Krahas portalit, Grupi Koha zgjeroi veprimtarinë e vet edhe në një platformë të re. E re për nga funksionimi, por edhe e para për nga ajo se çfarë ofronte.
Një televizion informativ 24-orësh, përmes të cilit synohej publikimi i lajmit derisa ai ishte duke ndodhur.
Puna në TV Arta, për gazetaren Arbnorë Luta, aq sa ka qenë sfidë është edhe kënaqësi.
Informimi i publikut përmes ArtaNews do të ishte i pamundur pa ekipin realizator, pjesë e të cilit është Milot Mujku.
Sfidat me të cilat përballet, Mujku thotë se janë të shumta, derisa shton se punën më të lehtë e bën bashkëpunimi me stafin.
Portali si dhe kanali informativ, tërë veprimtarinë e tyre ditore e zhvillojnë në bashkëpunim të ngushtë me gazetën Koha Ditore dhe Kohavisionin.
© KOHA. Të gjitha të drejtat janë të rezervuara.
