4 perditesime
21:16

Hoti: VV-ja na propozoi shkarkimin e Thaçit dhe një president jashtpartiak

Anëtari i kryesisë dhe deputeti i Lidhjes Demokratike të Kosovës, Avdullah Hoti ka thënë në tri javët e fundit kanë hyrë në zonën e kuqe dhe nuk ka kuptim vonimi i konstituimit të institucioneve.

Hoti në Rubikon thotë se është plotësisht në dorën e Kurtit që ta marrë mandatin nga presidenti qysh nesër.

“Ne nuk do t’ia kthejmë përgjigjen për këtë letër. Ne jemi të gatshëm të shkojmë në takim vetëm nëse Vetëvendosje na thërret për të nënshkruar marrëveshje”, ka thënë ai.

Ai ka shtuar se janë dispozitat kushtetuese të cilat nuk e bëjnë të qartë zgjedhjen e qeverisë për herën e dytë.

Hoti thotë se ka fituar përshtypjen personale se Kurti nuk dëshiron marrëveshje me LDK-në.

“Përshtypjet e mija nga sjella e tij në takime është se ai nuk dëshiron të arrijë marrëveshje, sepse asgjë nuk do ta pengonte Kurtin që ta krijonte qeverinë. Ata nuk e kanë pranuar asnjëherë propozimin për kandidat për president të bërë nga LDK-ja. Ata po synojnë që ta kenë kryeministrin, kryetarin e Kuvendit dhe presidentin. Nëse ata nuk e premtojnë mbështetjen për LDK-në ata po e duan për vete”, ka thënë ai.

Ai tutje ka treguar ofertën e Vetëvendosjes për pozitën e presidentit.

Hoti thotë se Vetëvendosje ka kërkuar që të dyja partitë të angazhohen për shkarkimin e presidentit aktual, dhe se të dyja të angazhohen për gjetjen e një kandidati jashtpartiak për president.

Sipas tij, Vetëvendosja ka propozuar se nëse dështon gjetja e këtij kandidati LDK-ja jep propozimin por i njëjti duhet të votohet nga organet e Vetëvendosjes.

Dhe pika e fundit sipas Hotit, nga VV është kërkuar të dyja partitë dakordohen se nuk do të kërkojnë asnjë votë jashtë koalicionit qeverisës.

Hoti thotë se për LDK-në do të ishte e pranueshme që të dyja partitë e mbështesin një kandidat të cilin e propozon LDK-ja e që i plotëson kërkesat kushtetuese.

“Ne kemi insistuar që për të mbërritur një balancë të pushteteve duhet një president që vjen nga LDK-ja”, ka thënë ai.

Duke folur për emrat e ministrave që VV ka propozuar, ai ka thënë se nuk është punë e tyre të komentojnë.

Ai thotë se nuk do të lejojnë që VV të ndërhyjë se kë e zgjedh LDK-ja kryetar të Kuvendit, duke shtuar se të njëjtit kanë pretenduar ta bëjnë një gjë të tillë.

“Nuk është në dorën tonë që të bëjmë koalicione me partitë tjera. Rrugët tona janë të qarta, ose hyjmë në koalicion me VV ose formohet një qeveri tjetër ku nuk jemi ne. Nuk shoh rrugë tjetër.”, ka thënë ai.

Hoti thotë se nëse vendi shkon në zgjedhje të parakohshme, nuk ka logjikë që dy subjektet pas zgjedhjeve të tentojnë të arrijnë marrëveshje.

20:55

Hoti: Mbesim të hapur për marrëveshje, e tejkalojmë edhe letrën e Kurtit

Avdullah Hoti, nga radhët e LDK-së, ka deklaruar se janë të gatshëm të tejkalojnë letrën e Kurtit, dhe mbesin të hapur për një marrëveshje me Vetëvendosjen.

Hoti thotë se dëshironin një marrëveshje që do të krijonte stabilitet katër vjeçar.

“Ne insistojmë për një marrëveshje që krijon stabilitet për katër vite. Ne kemi kërkuar kryeparlamentarin, kurse VV-ja dy nënkryetarët. Assesi nuk kemi pasur mundësi të dakordohemi për presidentin që është nonsens. Marrëveshja që ata propozonin për presidentin tregonte se ne do të shkonim në zgjedhje më 2021. Besoj se jemi sjellë korrekt deri më tani dhe do të vazhdojmë të sillemi njëjtë”, ka thënë Hoti.

Ai thekson se letra e Kurtit ishte e panevojshme.

“Nëse Mustafa do të sillej si Kurti do të shkruanim një letër të tillë, që është një pamflet. Unë besoj se duhet të ruajmë respektin ndaj njëri-tjetrit edhe kur nuk pajtohemi. Kjo letër është e panevojshme dhe shumë e papërshtatshme. Nuk ka kuptim kjo formë e komunikimin ndërmjet dy partive që synojnë të qeverisin. Nuk do t’i përgjigjemi, pasi kjo nuk meriton përgjigje. Pavarësisht kësaj Mustafa është deklaruar se ne mbesim të hapur për arritjen e marrëveshjes, pasi kjo letër nuk është konsideruar serioze”, shprehet ai.

Hoti insiston se respekti duhet të ruhet.

“Le të supozojmë se edhe nuk arrijmë marrëveshje, por respekti duhet të ruhet dhe nuk duhet të komunikohet në atë mënyrë. Ne kemi kaluar si LDK edhe barriera shumë më të mëdha për të gjetë një gjuhë të komunikimit në interes të qytetarëve. Më lehtë për ne do të ishte që të qëndronim në opozitë. Ne kemi pranuar të bashkëpunojmë me ta edhe duke e ditur historikun kur kreu i LDK-së ka qenë i sulmuar, e ne e tejkalojmë edhe këtë letër dhe të lëmë derën hapur për një marrëveshje”, u shpreh Hoti.

Ai shton se do të shkonin në një takim nëse ftohen nga Vetëvendosje, por vetëm për të nënshkruar marrëveshjen që kanë propozuar.

“Besoj se do të shkonim nëse na fton z. Kurti. Nëse Vetëvendosje e pranon ofertën tonë atëherë e nënshkruajmë atë. Kemi biseduar shumë gjatë. Nëse VV-ja dëshiron koalicion me LDK-në kjo është forma që ne e shohim, e si merren vesh ata brenda partisë është punë e tyre. Nuk e shoh se si mund të punojmë bashkë nëse nuk merren parasysh këto parime që ka kërkuar LDK-ja, ndryshe nuk e shoh se si mund të punojmë. Ne kemi hyrë që të kemi një balanc të përgjegjësive. Nuk është në dorën tonë se kur Kurti e merr mandatin”, ka thënë Hoti.

20:38

Hoti: VV po na shtynë të bëjmë pazare, sjellja e tyre nuk jep shpresë për bashkëpunim

Anëtari i kryesisë dhe deputeti i Lidhjes Demokratike të Kosovës Avdullah Hoti ka thënë se Vetëvendosje nuk është e interesuar që të arrijë marrëveshje me LDK-në.

Sipas tij një logjikë e shëndoshë nuk ka si ta kuptoj ndryshe përveç mungesë e dëshirës për arritje të marrëveshjes.

“Unë jam i bindur se ata nuk janë duke e vlerësuar partneritetin me LDK. Me datë 26 nuk ka pasur marrëveshje mes LDK-së dhe Vetëvendosjes. Edhe ne kemi përgjegjësi në ndërtimin e institucioneve. Meqenëse nuk kemi dal të parët në zgjedhje ne nuk mund t’i ndërtojmë institucionet. Ne kemi mund pas 26 dhjetorit të i mbyllim rrugët për bashkëpunim por ne nuk e bëmë”, ka thënë ai.

Ai ka thënë se mënyra se si janë sjellë deri tash Vetëvendosje deri tash nuk lë shumë hapësirë për shpresë bashkëpunimi.

Hoti thotë se nuk janë ulur në një tavolinë për të bërë pazare.

Ai thotë se me Vetëvendosjen nuk u prishën për pozita, por se shton se është çështje e parimeve barazia në qeverisje.

“Kita janë duke na shtyrë hajde bëjmë Pazar. Ajo çka po bënë Vetëvendosje i bie që është pazar. Rritja e numrit të ministrive është e pakuptueshme. Ne jemi për ta ndarë përgjegjësinë”, ka thënë ai.

20:32

Hoti: Propozimi i Konjufcës për kryeparlamentar mesazh i qartë se VV-ja s’donte marrëveshje

Anëtari i kryesisë së LDK-së dhe deputeti, Avdullah Hoti në Rubikon të KTV-së ka thënë se propozimi i Glauk Konjufcës për kryetar të Kuvendit ishte mesazh i qartë se Vetëvendosje nuk donte marrëveshje me LDK-në.

Ai thotë se është përgjegjësia e Vetëvendosjes ta formojë qeverinë, derisa thekson se edhe për ta Vetëvendosje ishte opsioni i vetëm për koalicion qeverisës.

“Edhe për ne ka qenë adresë e vetme Vetëvendosje. Është përgjegjësi e tyre të formojnë institucionet, ofertën e djeshme besoj se nuk asnjë kuptim të mos konsiderohet nga VV-ja”, ka thënë Hoti.

Letrën e sotme të Albin Kurtit ai e ka quajtur lojë fjalësh, derisa thekson se me anë të saj na është treguar se s’ka marrëveshje me ne.

“Sikur kjo letër ashtu edhe propozimi i jonë për kryeparlamentar është lojë fjalësh. Përveç asaj video na është dhënë mesazhi se s’ka marrëveshje me neve. Mirë, nëse s’ka marrëveshje me neve atëherë ne s’kemi dashur të pengojmë. Kur Kurti e propozoi Konjufcën ka qenë mesazh i qartë për neve se nuk duan marrëveshje me nesh. Ne nuk jemi bllokues të institucioneve, e nuk duam të shihemi se jemi të tillë. Kjo është krejt lojë e VV-së, vërtetohet edhe mënyra se si Kurti ka vepruar për dhënien e mandatarit nga Presidenti”, ka thënë Hoti.

Sipas tij Kurti ishte dashur të kërkonte më 26 dhjetor që të shtyhej konstituimi i Kuvendit, pasi nuk kishte marrëveshje.

“Mënyra se si është sjellë Kurti ka qenë jo korrekte karshi neve. Ne ishim të dakorduar për kryetar të Kuvendit, jemi dakorduar që ai t’i takojë LDK-së. Ne nuk kemi ofruar emër për kreun e Kuvendit pasi s’ka pasur marrëveshje. Jam i bindur se kemi bërë maksimumin e vazhdojmë ta bëjmë maksimumin, megjithëse kjo letër nuk e lënë derën hapur. Mënyra se si barrikadakohet në këtë letër, sa i përket kryetarit të Kuvendit pothuajse është e pamundur të arrihet marrëveshja”, u shpreh ai.

Ai shton se kjo ishte oferta e tretë e LDK-së.

“E para ka qenë nga 6 tetori, një marrëveshje të balancuar brenda institucioneve. Që në njërën anë është kryeministri, dhe gjysma e qeverisë dhe në anën tjetër është kryetari i Kuvendit me gjysmën e qeverisë, si dhe ajo e presidentit. Nuk ka qenë peshim më i madh. Kryeministri është pozita kryesore në vend. Qeveria është kryeministri, asgjë nuk bëhet padakordimin e kryeministrit. Kjo është oferta e parë e dakorduar në organet e LDK-së, e përtej kësaj kreu i LDK-së ka propozuar që në momentin kur LDK-ja e propozon presidentin atëherë një ministri i jepet VV-së, pra 6-4”, u shpreh ai.

Ai thekson se, “në takimin e 6 janarit kemi hequr dorë nga pozita e kryeparlamentarit t’i takojë VV-së për tre vite të tjera, derisa të vjen koha e presidentit. VV-ja i ka dy pozita të mëdha. Gjatë 2020 kur presidenti nuk është i yni, atëherë kryeministri e krye parlamentari do t’i takonin VV-së”.

Hoti konsideron se kompromisi më i madh ishte ulja në tavolinë me VV-në.

“Kompromisi më i madh i joni është me u ulë në tavolinë të bisedojmë me ta. E kemi tejkaluar këtë gjatë dy viteve në opozitë. Kurti i ka hëngër fjalët e veta për këtë. I ka rënë pishman që është shprehur ashtu, pasi nuk gjen një anëtar të LDK-së që t’i atribuohen ato. Nuk e kemi shumë të këndshëm në të kaluarën me VV-në. Kemi qenë të bindur se mund të ndërtojmë një koalicion të përbashkët, por ngarendja e tyre për pushtet absolut”, ka thënë Hoti.

20:10

Hoti: Kurti në letër nuk u përgjigj për ofertën e LDK-së, e konsiderojmë jozyrtare

Anëtari i kryesisë dhe deputeti i Lidhjes Demokratike të Kosovës Avdullah Hoti e ka quajtur totalisht të panevojshme letrën e kryetarit të Lëvizjes Vetëvendosje, Albin Kurti.

Ai në Rubikon të KTV-së tha se letra e sotme e Vetëvendosjes përmban një narrativ të panevojshëm dhe të papërshtatshëm.

“Kjo letër është kthim prapa sepse ne kemi punuar bashkë si parti opozitare. Para se të hymë në fushatë kemi pasur takime dhe kemi krijuar relacion se si duhet të punojmë bashkë. Unë për dy vite, jam munduar dhe kam gjetur bashkëpunim të mirë nga ana e Konjufcës. Plotë iniciativa që kanë qenë kundër interesit të Kosovës ne i kemi parandaluar”, ka thënë ai, duke e përmendur ndaljen e iniciativës për zhbërje të Gjykatës Speciale.

Hoti thotë se gjatë opozitës e kishin ndërtuar një komunikim korrekt, duke shtuar se të njëjtën e bënë edhe gjatë fushatës e pas fushatës.

Ai thotë se duke pasur parasysh këtë bashkëpunim, forma e komunikimit me letra është e papërshtatshme.

“Nuk jemi duke e marrë shumë seriozisht këtë letër, jemi duke e konsideruar që nuk është shumë zyrtare. Ai në letër nuk përgjigjet askund për ofertën që e kemi bërë dje”, ka thënë ai.