Arbëri

Kuvendi konfirmon seancën e jashtëzakonshme të 3 qershorit

Kuvendi konfirmon seancën e jashtëzakonshme të 3 qershorit
Foto: Ilustrim / Kuvendi i Kosovës
14:30

Kuvendi konfirmon seancën e jashtëzakonshme të 3 qershorit

Kuvendi i Kosovës zyrtarisht ka konfirmuar se nesër më 3 qershor, mbahet seanca e jashtëzakonshme me të vetmen pikë të rendit të ditës, votimin e Qeverisë Hoti.

“Me kërkesë të 61 deputetëve, Kuvendi i Republikës së Kosovës, do të mblidhet nesër në orën 11:00 në seancë të jashtëzakonshme, me të vetmen pikë të rendit të ditës: zgjedhja e Qeverisë së Republikës së Kosovës’, thuhet në njoftimin zyrtar të Kuvendit.

11:20

Seanca për votimin e Qeverisë Hoti nesër në orën 11:00, LDK-ja thotë se i ka votat

Nesër në orën 11:00 do të mbahet seanca në Kuvendin e Kosovës për formimin e Qeverisë së re, në krye me Avdullah Hotin.

Lajmin e konfirmoi shefi i Grupit Parlamentar të LDK-së, Arben Gashi.

“Pas marrjes së Aktgjykimit në emër të Lidhje Demokratike kam dorëzuar kërkesën për seancë për të mërkurën në orën 11:00 me të vetmen kërkesë të rendit të ditës, votimin e Qeverisë së re”, është shprehur Gashi.

Sipas Gashit, LDK-ja i ka të gjitha votat të konfirmuara.

“Ne jemi të bindur se i kemi votat e mjaftueshme për të formuar qeverinë, ne jemi të bindur që nuk do të dështojë dhe jemi të bindur se nesër do të kemi qeveri”, ka thënë ai.

Për çështjen e Nismës dhe emrave të mundur të ministrave, Gashi s’ka dashur të komentojë.

Vendimi i kryesisë vjen pasi Lidhja Demokratike e Kosovës, me tu publikuar aktgjykimi i Gjykatës Kushtetuese për dekretin e presidentit Hashim Thaçi, iu drejtua Kuvendit me kërkesë për seancë.

Pas rrëzimit të qeverisë së drejtuar nga Albin Kurti, LDK-ja ka arritur koalicion të bashkëqeverisjes më Aleancën për Ardhmërinë e Kosovës, Nismën Socialdemokrate dhe minoritetet.