Arbëri

Thaçi tre muaj më parë i besonte Mustafës, tash i beson IKSHPK-së

Thaçi tre muaj më parë i besonte Mustafës, tash i beson IKSHPK-së

Presidenti i Kosovës, Hashim Thaçi, i është bashkuar të hënën thirrjeve drejtuar qytetarëve për kujdes dhe për respektim të rekomandimeve të Institutit Kombëtar të Shëndetësisë Publike në përballimin e emergjencës shëndetësore. Në konferencë për media ai ka folur edhe për insistimin e tij që të shpallet gjendja e jashtëzakonshme, qysh në muajin mars, kur në Kosovë ishin regjistruar vetëm 19 raste me COVID-19. Ndërmarrja e një veprimi të tillë ka thënë se ka qenë e partive politike. Nuk ka përmendur emra, ndonëse dihet se propozimin për gjendjen e jashtëzakonshme, disa orë para Thaçit, e pati dhënë vetëm kryetari i LDK-së, Isa Mustafa.

“Ideja e partive politike drejtuar presidentit të vendit ka qenë për gjendje të jashtëzakonshme. Unë e kam pasur për obligim kushtetues edhe ligjor ta diskutoj natyrisht, ta procedoj, por ajo që mund të them është se unë kurrë nuk kam pasur ndonjë pretendim entuziast sa i përket asaj gjendjeje, unë kam pasur për qëllim vetëm për të implementuar vullnetin e gjithë spektrit politik, por para së gjithash shëndetin e qytetarëve të vendit”, është shprehur Thaçi, raporton KOHA.