00:10

Demaj për shkarkimin e Osmanit nga LDK-ja: Tejkaloi kompetencat e mendimit ndryshe

Sipas deputetit të LDK-së Frashër Demaj, shkarkimi i kryeparlamentares Vjosa Osmani nga pozita e nënkryetares së partisë ka ardhur pasi ajo ka tejkaluar kompetencat e mendimit ndryshe në këtë parti.

Sipas tij, në LDK është i lejuar mendimi ndryshe, “por brenda subjektit ka edhe dokumente që duhen respektuar”.

“Jam anëtar i LDK-së. Ka vendime që shpesh nuk më pëlqejnë, por janë të shumicës. E bëj luftën time politike brenda subjektit tim për aq kohë sa s’është marrë vendim që është përkrahur nga shumica. Kur merret ai vendim, bazohem në rregullat e demokracisë dhe e respektoj atë vendim. Për fat të mirë, apo të keq, atë ditë kam qenë në Rugovë, si delegacion për të bë vizitë. Nuk e kam pa e-mailin e praktikisht s’kam marrë pjesë në votim për shkarkimin e saj. Dua të sqaroj pozicionin tim. Në situata politike që s’më pëlqejnë të jeni të bindur që kam plot pajtueshmëri me vendimet, por jam deputet i LDK-së. Jam bë deputet me logon e saj. Respektohet vendimi i shumicës në demokraci. Si vendim merret ai mendimi i shumicës. Nuk na ndal askush mendimin ndryshe. Bile në LDK është shumë i përhapur. Përmenda rregullat e demokracisë, por brenda një subjekti ka edhe dokumente që duhet respektuar. Ndër to është statuti i partisë. Ai si dokument nuk na lë të dalim jashtë kornizave logjike të rezonimit politik për çështje të caktuara. Më duket se ka tejkaluar kompetencat e mendimit ndryshe veprimet e fundit të zonjës Osmani. Në kuptimin që sot për shembull Osmani nuk votoi vendimet e LDK-së”, ka thënë ai në Interaktiv.

Sipas Demajt, shkarkimi i Osmanit nuk do të thotë përjashtim nga LDK-ja. Ai ka thënë se kjo parti nuk e ka logjikë përjashtimin e zyrtarëve.

“S’jam bë deputet si kandidat i pavarur, por me logo të LDK-së. Duhet ta respektoj atë logo. Kur nuk pajtohem dhe veproj ndryshe vendimeve të forumeve partiake, për veten time, kaloj si deputet i pavarur ose bëj planet politike. S’dua të gjykoj veprimet e asnjë njeriu brenda LDK-së sepse gjithsecili është përgjegjës dhe përgjegjshme për vendimet që merr. Nuk do të doja që të largohej nga LDK-ja. Në asnjë mënyrë. Ajo është shkarkuar nga pozita e nënkryetares së partisë. Por ajo s’është përjashtuar dhe s’ka logjikë përjashtimi te LDK-ja. Mund të jem nënkryetar, por mund që për arsye të caktuara të shkarkohem apo të dorëhiqem. Por LDK-ja s’ka logjikë përjashtimi nga partia. Tolerohet mendimi ndryshe dhe është në përgjegjësinë time në ç’raport do të shkojë mendimi ndryshe. Them që është çështje e zonjës Osmani, por duhet ta themi se LDK-ja e ka respektuar maksimalisht. E ka caktuar kandidate për kryeministre, por për fat të keq nuk fituam. Për votimin e saj kemi qenë të mobilizuar të gjithë. Edhe në fushatë, edhe forume kemi thënë votoni 1-shin e pastaj katër tjerë. Është meritë e saj natyrisht, por edhe e strukturave të partisë”, ka vazhduar ai.

Demaj ka thënë se qytetarët nuk do ta dënojnë LDK-në për shkarkimin e Osmanit. Ai ka thënë se LDK-ja ka elektorat stabil.

“S’besoj që do të na dënojë. Pres që qytetari të na mirëkuptojë. Në përplasje politike dikush mund të shkojë e dikush të vijë. LDK-ja ka elektorat stabil, shtrirje të fuqishme horizontale. Ka shtrirje në gjithë Kosovën pa u dalluar shumë se cila zonë dominohet nga LDK-ja. Përderisa partitë tjera janë fokus dihet ku janë më të forta”, ka thënë Demaj.

23:53

Demaj: Pa pajtimin e opozitës nuk mund të ketë marrëveshje finale

Frashër Demaj, deputet i LDK-së, në Interaktiv të KTV-së ka thënë se pa pajtimin e opozitës nuk mund të ketë marrëveshje finale me Serbinë.

Ai thotë se mos ratifikimi i marrëveshjeve ndërkombëtare në Kuvend mund të rezultojë me humbjen e shumë fondeve për Kosovën.

“Për fat të keq edhe sot nuk kishte mirëkuptim ndërmjet koalicionit qeverisës dhe opozitës. PDK-ja dhe VV-ja refuzuar të votojnë këto marrëveshje ndërkombëtare. Tash sigurisht se do të ketë një debat më të gjerë në mënyrë që të gjejmë gjuhën e kompromisit në mënyrë që të mos i humbim këto fonde, kur dihet gjendja në të cilën jemi. Ekonomia ka nevojë për një infuzion financiar. Shteti ka përgjegjësinë dhe obligimet që të merret edhe me COVID-in. Shpresoj se deputetët do të gjejnë arsye dhe t’i votojnë këto marrëveshje pasi do të vijnë sërish në Kuvend”, ka thënë Demaj.

Ai thotë se për çështjet me interes nacional pozita e opozita duhet të gjejnë gjuhë të përbashkët.

“Qeveria ndërmjet VV-së dhe LDK-së nuk ishte shumë jetëgjatë. Prej momentit të mocionit ne kishim një qeveri në detyrë, dhe ku ajo është në detyrë marrëdhëniet nuk janë njësoj sikur ajo është aktive. Këtu ka pasur hezitime në këtë raport, por për fat të keq ne jemi inatçi dhe për shkak të kësaj rrezikojmë, prandaj jam për ndryshim të diskursit”, ka thënë Demaj. “Qytetaria e Kosovës është ajo që e vlerëson se kush është i miri apo i keqi. Sot për mendimin tim kanë bërë një gabim të madh partitë. Kosova mund të humbë shumë nga mos ratifikimi i këtyre marrëveshjeve ndërkombëtare”.

Sipas tij heqja e taksës dhe reciprocitetit është bërë në harmoni me SHBA-në, vendet e BE-së dhe Britaninë e Madhe, dhe se një gjë e tillë nuk është në dëm të interesave të Kosovës.

“Shtetet e vogla po nuk qenë aleat me të mëdhenjtë asnjëherë nuk mund të realizojnë interesat e tyre, as politike, as ekonomike, as gjeostrategjike. Kosova nuk ka asnjëlloj perspektive pa SHBA-në, Britaninë, Gjermaninë e shtetet e tjera të mëdha”, ka thënë Demaj.

Ai thotë se marrëveshjen finale me Serbinë duhet të respektohet Kushtetuta e Kosovës.

“Shkuarja në Washington nuk nënkupton përfundimin e procesit, ndoshta kjo mund të jetë fillimi i fazës së fundit të bisedimeve. Në një moment të caktuar do të ketë marrëveshje, por jam i sigurt se nuk ka asnjë lloj të presioni të SHBA-së në raport me Qeverinë e Kosovës për të firmosur ndonjë marrëveshje që cenon interesat e Kosovës. Në bisedimet me Serbinë duhet të respektohet Kushtetuta e Kosovës”, ka thënë Demaj.

E një marrëveshje finale me Serbinë do të mund t’i hapte rrugë shumë çështjeve të tjera të rëndësishme.

“Nëse Kosova dhe Serbia bien në një marrëveshje për njohje reciproke të njëra tjetrës, pastaj këto hapin çështje të tjera me interes siç është çështja e të zhdukurve. Pastaj Serbia ka plaçkitur trashëgiminë kulturore. Momenti që i hap rrugë këtyre çështjeve është ai i njohjeve reciproke. Na krijohet mundësia për anëtarësim në organizata të tjera me shumë rëndësi siç janë OKB, UNESCO, INTERPOL etj. Madje kam kërkuar që të ketë akomodim të opozitës në procesin e dialogut”, ka thënë Demaj.

Ai thotë se s’mund të ketë marrëveshje finale pa u pajtuar edhe opozita.

“Qeveria nuk ka nevojë që të lëshohet në kompromise, por ajo duhet ta respektojë plotësisht Kushtetutën. Gjithçka do të jetë transparente dhe pa pajtimin e opozitës nuk mund të ketë marrëveshje finale. Janë serioze edhe Vetëvendosje edhe PDK-ja. Pra, interesi është i përgjithshëm. Edhe në këtë rast kam dyshime te Serbia, por kam besim në SHBA-në dhe në vendet e Bashkimit Evropian”, ka thënë Demaj.