23:43

Kusari-Lila Hotit: Cila është arsyeja e vërtetë e shtyrjes së takimit në Shkodër?

Deputetja Mimoza Kusari-Lila ka thënë se Avdullah Hoti duhet të tregojë arsyen e vërtetë të shtyrjes së takimit në Shkodër ndërmjet Qeverisë së Kosovës dhe asaj të Shqipërisë.

“Të jesh në krye të vendit në kohë krize, duhet të paktën të kesh empati për problemet që kanë qytetarët e atij vendi dhe të komunikosh hapur me qytetarët për limitet që i ke. Jo të jesh i mpirë nga dehja me pushtetin në njërën anë, ndërsa në anën tjetër të fshihesh prapa arsyetimeve boshe dhe prapa përgjegjësive të institucioneve tjera, e vetë nuk ke as transparencë dhe as llogaridhënie”, ka shkruar Kusari-Lila në Facebook.

Sipas saj Hoti nuk është i sinqertë as para popullit as para Kuvendit.

“Avdullah Hoti, tashmë e dëshmoi se nuk ka qëndrueshmëri në bindjet e veta, i ndryshon ato publikisht pa asnjë pendim dhe nuk është fare i sinqertë as para popullit dhe as para Kuvendit. Një bindje të njëjtë mosbesimi të krijon arsyetimi për shtyerje të mbledhjes së përbashkët midis dy qeverive, asaj të Kosovës dhe të Shqipërisë. Si t’i besohet arsyetimit të njeriut që deri më tani asnjë qëndrim nuk e mbajti, as brenda tre muajve të një mandati”, ka thënë ajo. “Kryeministri, para se të mundohet të fshihet prapa Kuvendit, sikur me dështimin e Qeverisë me pakon e rimëkëmbjes, është mirë të mos e arsyetojë shtyerjen e mbledhjes së dy qeverive me seancën e Kuvendit”.

Kusari-Lila shton se, “Jemi mësuar Kuvendi me karriget e Qeverisë bosh, e vazhdojmë agjendën e mbetur edhe pa ta. Ndërsa, ata të vazhdojnë takimin e dy qeverive, përveç nëse nuk është arsyeja e shtyrjes diku tjetër?! E në atë rast, është më mirë të tregojë hapur, çka e bëri të shtyhet mbledhja në Shkodër?”.

22:10

VV-ja Hotit: Mbajeni mbledhjen e qeverive, në Kuvend të presim më 28 shtator

Drejtuesi i Grupit Parlamentar të Lëvizjes Vetëvendosje, Rexhep Selimi, përmes një postimi në Facebook i ka kërkuar kryeministrit Avdullah Hoti që të mos e shtyjë mbledhjen e dy qeverive.

“Le të mbahet mbledhja përbashkët e qeverive! Mbledhja e dy qeverive, të Shqipërisë dhe e Kosovës, në Shkodër është në interes të të gjithë qytetarëve tanë. Si drejtues i Grupit parlamentar të LV, kërkues i raportimit të Hotit në Kuvend, publikisht e njoftojmë Hotin që mos të tërhiqet nga mbledhja me Qeverinë e Shqipërisë të premten me 25 shtator”, ka shkruar Selimi.

Selimi ka shtuar se më 28 shtator e presin në Kuvend që të raportojë.

“Ne e presim të hënën me 28 le të vijë të raportojë në Kuvend”, ka shkruar Selimi.

E për të njëjtën çështje ka shkruar në Facebook edhe nënkryetarja e Kuvendit nga radhët e Vetëvendosjes, Arbërie Nagavci.

“Si inicuese e kërkesës për të thirrur në raportim z. Avdullah Hoti lidhur me 100 ditëshin e tij, e presim në Kuvend javën e ardhshme. Nuk ka nevojë që të anulojë mbledhjen e përbashkët me Qeverinë e Republikës së Shqipërisë. Përkundrazi. Nëse z. Hoti do të anulojë diçka, le të anulojë takimet me Vuçiqin me arsyetimin se nuk ka mandat nga Kuvendi për koncesionet që po i bën Serbisë dhe se duhet të raportojë para deputetëve. Me këtë anulim të takimit me z. Vuçiq, të paktën do të kishim një dëm më pak nga shumë që tashmë kanë sjellë”, ka shkruar Nagavci.

20:13

Shtyhet mbledhja e qeverive Kosovë-Shqipëri

Kryeministri Avdullah Hoti ka njoftuar se është shtyrë mbledhja mes Qeverisë së Kosovës dhe asaj të Shqipërisë e paraparë të mbahej këtë të premte.

Përmes një postimi në Facebook, ai ka shkruar se mbledhja do të mbahet më 2 tetor.

“Për shkak të seancës së Kuvendit të Kosovës, u dakorduam me Kryeministrin Rama që mbledhjen e përbashkët të dy qeverive tona, të paraparë për këtë të premte, ta mbajmë më 2 tetor. E falënderoj Kryeministrin Rama për mirëkuptimin dhe dy ekipet tona për përgatitjen e mbledhjes”, ka shkruar ai.