Kurti pritet të takohet sot me Lajçakun, Osmani nesër

Përfaqësuesi i Posaçëm i Bashkimit Evropian për dialogun Beograd - Prishtinë dhe çështje të tjera rajonale të Ballkanit Perëndimor, Mirosllav Lajçak, do qëndrojë në Kosovë për një vizitë treditore.

Gjatë së hënës ai do takohet me liderin e Lëvizjes Vetëvendosje, Albin Kurti. Kjo është bërë e ditur nga zyrtarë të kësaj partie, ku thonë se Kurti do takohet me Lajçakun pasdite, duke mos përmendur orë të caktuar.

Me përfaqësuesin e BE-së do takohet edhe ushtruesja e detyrës së presidentes, Vjosa Osmani. Takimi pritet të fillojë të martën në orën 08:00, ka bërë të ditur Bekim Kupina, këshilltari i Osmanit.

KOHA ka tentuar të komunikojë edhe me zyrtarë të Partisë Demokratike të Kosovës dhe Aleancës për Ardhmërinë e Kosovës për ndonjë takim të planifikuar me Lajçakun, mirëpo të dy partitë kanë qenë të paqasshme.

Nga zyra e kryeministrit në detyrë, Avdullah Hoti, kanë thënë se nuk e posedojnë agjendën e takimeve të Lajçakut, derisa nuk është bërë e ditur nëse Hoti dhe përfaqësuesi i BE-së do takohen sot.

Përfaqësuesi i Posaçëm i Bashkimit Evropian për dialogun Beograd - Prishtinë dhe çështje të tjera rajonale të Ballkanit Perëndimor, Mirosllav Lajçak, sot do nis vizitën në Ballkanin Perëndimor. Vizitën e parë do ta bëj në Prishtinë, ku do qëndrojë tri ditë.

Më pas, Lajçaku do vizitojë Serbinë nga 3 deri më 4 mars dhe gjithashtu do vizitojë Malin e Zi si pjesë e mandatit të tij rajonal, nga 4 deri më 5 mars.

Ai ka planifikuar të takohet me udhëheqjen politike të tre partnerëve të Ballkanit Perëndimor, si dhe me përfaqësues të BE-së në terren.

© KOHA. Të gjitha të drejtat janë të rezervuara.