1 perditesime
08:40

Osmani: Ditë e bardhë sot

Kandidatja për presidente të Kosovës, Vjosa Osmani, ka postuar një fotografi të borës me mbishkrimin “Ditë e bardhë sot” në rrjetin social Facebook. 

Me këtë foto, Osmani duket se ka aluduar në formimin e institucioneve të reja, që pritet të ndodhë sot, fillimisht me konstituimin e Kuvendit të Kosovës.

Sa i përket formimit të Qeverisë, ende nuk dihet nëse një gjë e tillë do të ndodhë të hënën.


Nagavci: Ditë e bardhë

Anëtarja e Lëvizjes Vetëvendosje, Arbërie Nagavci, përmes një shkrimi në Facebook ka thënë se sot është një “ditë e bardhë”, duke aluduar në lidhje me konstituimin e Kuvendit të Kosovës, që do të ndodhë sot.

KOHA ka raportuar më herët se Nagavci pritet të marrë detyrën e ministres së Arsimit në Qeverinë Kurti 2, mirëpo nuk dihet ende nëse formimi i Qeverisë do të ndodhë në seancën e sotme parlamentare.

 

08:28

Kusari-Lila: Sot fillon të shkruhet një faqe e re e historisë së Kosovës

Deputetja e zgjedhur nga radhët e Alternativës, Mimoza Kusari-Lila, ka shkruar një mesazh në Facebook pak orë para fillimit të seancës konstituive sot.

Kusari-Lila ka garuar në listën e Vetëvendosjes dhe është zgjedhur deputete. Ajo do të betohet sot në Kuvend si deputete.

“Sot fillon të shkruhet një faqe e re e historisë së Kosovës. Ta shkruajmë bukur së bashku për të gjithë ata që do të vijnë pas nesh. Mbarësi dhe fat vendi im”, ka shkruar Kusari-Lila në Facebook.