Arbëri

Nagavci mohon akuzat për punësime të njerëzve të VV-së: S’do të tolerojmë asnjë ndikim politik

 

Ministrja e Arsimit, Arbërie Nagavci, ka mohuar akuzat se në Këshillin Shtetëror të Cilësisë janë emëruar persona që kanë lidhje me Lëvizjen Vetëvendosje. Në një reagim në Facebook, Nagavci ka thënë se “nuk do të tolerojë asnjë ndikim politik”.

Të premten, Partia Demokratike e Kosovës akuzoi Qeverinë Kurti se në KSHC ka emëruar pjesë të bordeve, njerëz që kanë lidhje me VV-në. Deputetja Eliza Hoxha akuzoi MASHT-in për punësimin e ish-aktivistit të VV-së, Rron Gjinovci, në komisionin për konkursin për anëtarët e Bordit të KSHC-së. Ajo akuzoi Ministrinë për përzgjedhjen e Seb Bytyçit në KSHC edhe “pse s’ka qenë pjesë e listës së parë të atyre që kanë plotësuar kushtet”. Hoxha ka përmendur edhe Hasnije Ilazin “e cila ka qenë e angazhuar në organizatën KEC të themeluar nga zëvendësministri aktual i Arsimit, Dukagjin Pupovci dhe ka qenë mentore e Rron Gjinovcit, si dhe profesorin Gëzim Tosuni i cili edhe publikisht tashmë dihet që është nipi i zv.kryeministrit Besnik Bislimi”.