KQZ-ja kontraktoi dezinfektues me 70 për qind alkool, mori sprej me 0 për qind
Se KQZ-së në vend të gelit me 70 për qind alkool, i është shitur sprej pa përmbajtje alkooli është konstatuar edhe nga auditori i brendshëm. Pos kësaj, aty janë evidentuar edhe shkelje të tjera te furnizimi me maska e dorëza mbrojtëse
Me materiale të dyshimta për mbrojtje kundër COVID-19 e përtej sasisë së përcaktuar me rregullore të brendshme, është furnizuar Komisioni Qendror Zgjedhor në zgjedhjet 14 shkurtit. Kompania kontraktuese nuk ka respektuar specifikat e tenderit duke furnizuar KQZ-në me dezinfektues pa bazë alkooli, edhe pse kërkesa ka qenë që ajo të përmbajë 70 për qind të kësaj substance. Shkeljet janë evidentuar edhe nga Auditori i Brendshëm i këtij institucioni teksa anëtarë të KQZ-së kanë kërkuar edhe ndërhyrjen e Prokurorisë për shkak të dyshimeve për dallavere
Premium
Me materiale të dyshimta për mbrojtje kundër COVID-19 e përtej sasisë së përcaktuar me rregullore të brendshme, është furnizuar Komisioni Qendror Zgjedhor në zgjedhjet 14 shkurtit. Kompania kontraktuese nuk ka respektuar specifikat e tenderit duke furnizuar KQZ-në me dezinfektues pa bazë alkooli, edhe pse kërkesa ka qenë që ajo të përmbajë 70 për qind të kësaj substance. Shkeljet janë evidentuar edhe nga Auditori i Brendshëm i këtij institucioni teksa anëtarë të KQZ-së kanë kërkuar edhe ndërhyrjen e Prokurorisë për shkak të dyshimeve për dallavere
Dezinfektues pa bazë alkooli kanë vendosur në duart e tyre zyrtarët e angazhuar nga Komisioni Qendror Zgjedhor për llogari të zgjedhjeve të 14 shkurtit. Kjo, për shkak se kompania kontraktuese ka realizuar furnizimin duke devijuar specifikat e vendosura në kontratën e lidhur me KQZ-në.
Mbështetur në dosjen e tenderit, dezinfektuesi 750 mililitra i kërkuar me përmbajtje 70 për qind alkool në mënyrë përdorimi gel, është pranuar me përmbajtje zero alkool dhe mënyrë përdorimi sprej.
Kjo ka ndodhur pavarësisht kërkesës së KQZ-së që t’u përmbahet specifikave, duke ia përkujtuar kontraktuesit se materiali i kërkuar ekziston në treg.
As sasia e dezinfektuesit nuk është pranuar sipas specifikave të kontratës.
Sasia e pranuar jashtë specifikave të kontratës është 7 mijë e 660 copë, ndërsa vlera e tyre e pranuar dhe paguar është rreth 40 mijë euro. Për një dezinfektues të tillë, janë paguar 5 euro e 20 centë.
Sasi përtej kërkesës ka pasur edhe për sprej dezinfektues pa alkool ku çmimi për njësi është paguar 3 euro e 98 centë.
Devijime të mëdha janë të evidentuar edhe te maskat mbrojtëse dhe dorëzat.
Ato shkojnë mbi 60 për qind mbi nevojat e përcaktuara nga standardi i vendosur për shpërndarjen e materialit antiCOVID.
Në kërkesën për inicim të aktivitetit të furnizimit me material anti-COVID, për maska sasitë e aprovuara dhe autorizuara janë 220 mijë e 860 copë, ndërsa në tabelën ku janë sasitë e rekomanduara është shuma prej 280 mijë e 126 copë apo rreth 60 mijë copë më tepër se sa ato të aprovuara.
Operatorët ekonomikë që ishin ftuar për negocim të kontratës “ECO Solution” dhe “Teknika”, kanë dorëzuar mostra me përbërje të njëjtë, produktet e dorëzuara si mostër kanë pasur dizajn të njëjtë dhe prodhuesi i produkteve ka qenë i njëjtë.
Vlera e tenderit ka qenë 136 mijë e 398 euro dhe fituese ishte shpallur Kompania ‘ECO Solution”.
KOHA ka kontaktuar në numrin zyrtar të kompanisë, por të shtunën nuk janë përgjigjur.
Shkeljet e kontratës janë evidentuar në një raport të auditorit të brendshëm, sipas të cilit në të gjitha fazat e implementimit të aktivitetit, kontrollet e vendosura nuk kanë arritur të identifikojnë mospërputhjet.
“Pranimi i materialit me specifika dhe kushte të tjera nga ato të kontratës paraqet rrezik që qëllimet e përcaktuara për zhvillimin e aktivitetit të mos realizohen dhe të shpenzohet buxhet për furnizime që nuk përmbushin qëllimet”, shkruhet aty.
Me propozim të Sekretariatit, KQZ-ja kishte miratuar udhëzimin lidhur me masat mbrojtësit për parandalimin e infektimit me COVID-19 të votuesve dhe stafit zgjedhor. Qëllimi i miratimit të tij ka qenë që të përcaktojë zbatimin e masave mbrojtëse antiCOVID në të gjitha fazat e zhvillimit të votimit, numërimit dhe dorëzimit të materialeve zgjedhore.
Sipas Auditorit të brendshëm, nuk është arritur që specifikat të cilat lidhen me sasitë e nevojshme për material antiCOVID të harmonizohen me masat e parapara.
“Sasitë e furnizuara dhe të pranuara të materialit për mbrojtje nga infektimi me COVID-19 janë shumë më të mëdha se ato të nevojshme dhe ato që janë rregulluar me Udhëzim Administrativ. Specifikisht, dallime të mëdha janë të shprehura te maskat mbrojtëse dhe dorëzat”, thuhet në raport.
Anëtarë të KQZ-së në mbledhjen e fundit kanë kërkuar që gjetjet e auditorit t’i dorëzohen prokurorisë.
“Komiteti i Auditimit e ka shqyrtuar raportin e Auditimit dhe ka konstatuar shkelje jashtëzakonisht të rënda, ka konstatuar vjedhje. Kjo duhet me shku në prokurori. Këtu ka hezitim, nëse ka hezitim po ju tregoj se unë si anëtar i Komitetit për Auditimit dhe si kryesues i Komitetit të Auditimit, nëse brenda kësaj jave nuk shkojnë raportet në Prokurori personalisht kam me i marrë unë dhe me i dërgu”, ka thënë anëtari i VV-së në KQZ, Sami Kurteshi.
Ndërkaq kryetari i KQZ-së, Kreshnik Radoniqi, ka thënë se raportin nuk do ta dorëzojë në prokurori pa e lexuar procesverbalin e Komitetit të Auditimit.
“Për ta paraqitur në Prokurori apo në Polici çdokush e ka atë të drejtë dhe e ka edhe obligim. Dua ta shoh se si çka është diskutuar prej Komitetit dhe çka janë gjetjet e Komitetit se vetëm prej raportit të Auditimit nuk mund ta japim një vlerësim, nuk jemi të fushës së prokurimit. Nëse duam t’i zbatojmë procedurat, kemi me i zbatu fije për pe, deri në fund. Nuk mundemi ne vetëm ‘shko dërgo raportin në Prokurori dhe unë po nënshkruaj bllanko në Prokurori’. Jo, kemi me pa një procedurë si ka rrjedhë’ dhe pastaj kemi me dërgu’ në Prokurori nëse është e nevojshme. Por me ngritë këtë çështje në 4 mbledhje dhe mos me ditë me u çkapë nga kjo çështje pa u zbatuar këto procedura si po kërkoj unë, po më duket e paarsyeshme”, ka thënë Radoniqi.
Ndërkaq, anëtari i PDK-së, Ilir Gashi, deklaroi se nuk është e nevojshme ta trajtojnë secilin procesverbal të këshillit të KQZ-së.
“Kemi këtu disa këshilla dhe nëse fillojmë tash me i trajtu procesverbalet se çka kanë folur anëtarët është e pamundur dhe e panevojshme. E dyta, po më duket se jemi duke e trajtuar si institucion ndaras çkado që ndodh. Kushdo që ka vërejtur apo sheh ose konsideron se ka parregullsi se diçka po ndodh jashtë kompetencave, është i thirrur për ta mbajtur pozicionin e vet. Ka mundësi që individualisht secili me ngritë çështje duke e trajtuar edhe këtë me ndonjë kallëzim penal”, ka thënë Gashi.
KOHA pati raportuar në fillim të këtij viti edhe për aktivitete të tjera prokurimi, për të cilat dyshohet se institucioni i KQZ-së është dëmtuar financiarisht mijëra euro.
Mbi 80 mijë euro është shuma që Komisioni Qendror Zgjedhor (KQZ) potencialisht e ka humbur në dy aktivitete tenderimi, vlera e të cilëve ka qenë rreth 300 mijë euro. Këto aktivitete ishin zhvilluar për llogari të zgjedhjeve të 6 tetorit të vitit 2019. Mbështetur në dosjet e tenderëve dhe analizën e dokumentacionit, ka pasur devijim të konsiderueshëm të çmimeve të kontraktuara me çmimet e konkurrencës në tregun e lirë. Për një laps kimik metali, KQZ-ja kishte paguar 9.30 euro. Kurse për 500 fletore me logo të institucionit, KQZ-ja ka shpenzuar 5 mijë euro.
Shumë veprime të përbashkëta mes KQZ-së dhe kompanive të kontraktuara, përfshirë transaksionet janë të padokumentuara dhe pakonfirmuara. Gjatë hulumtimit, KOHA ka kuptuar se shkeljet që kanë shoqëruar aktivitetet e prokurimit janë konstatuar edhe nga Auditori i Brendshëm, por që zyrtarisht ende nuk janë adresuar nga organet ndjekëse. KOHA ka pyetur në prokurori në lidhje me dyshimet për dallavere me tenderë, por nuk kanë ofruar përgjigje.
