Kryeministri i Kosovës, Albin Kurti, bashkë me ministrin e Shëndetësisë, Rifat Latifi dhe ish-ministrin e këtij dikasteri, Arben Vitia, ka mbajtur një takim virtual me Sir Jeremy Farrar – ekspert botëror për menaxhimin e pandemisë COVID-19.
Siç bëhet e ditur nga Zyra e Kryeministrit, Sir Jeremy ka ofruar ekspertizën e tij se si Kosova duhet të përgatitet për variantin Omicron, i cili po përhapet me shpejtësi në shumë vende të botës.
“Ai ka theksuar se ardhja e variantit të ri në Kosovë, e shoqëruar me një rritje të shpejtë të infektimeve, është e pashmangshme ashtu edhe në të gjithë botën. Mirëpo, ai njëkohësisht e ka përgëzuar Kosovën për suksesin e saj në mbajtjen nën kontroll të gjendjes epidemiologjike dhe ka vlerësuar se kjo gjendje aktuale do të favorizojë Kosovën në ballafaqimin me valën e variantin Omicron, sidomos në krahasim me vendet tjera, të cilat po ballafaqohen njëkohësisht me valën e këtij varianti dhe të atij paraprak”, thuhet më tej në njoftimin e Zyrës së Kryeministrit.
Një nga këshillat nga Sir Jeremy se si vendi mund të përgatitet për valën e ardhshme është vazhdimi i fushatës së vaksinimit, që përfshin vazhdimin e vaksinimit të sa më shumë qytetarëve, me dy dozat e para të vaksinës dhe shkurtimin e periudhës së pritjes për dozën përforcuese prej gjashtë deri në tre muaj pas marrjes së dozës së dytë.
Mes tjerash thuhet se ai u tregua i gatshëm për të ofruar ekspertizën e tij dhe për t’i mbajtur vazhdimisht të informuar kryeministrin dhe ministrin e Shëndetësisë për zhvillimet më të fundit shkencore rreth variantit të ri Omicron dhe çështjeve të tjera lidhur me pandeminë.
Sir Jeremy Farrar është drejtor i Fondacionit “Wellcome Trust” të Mbretërisë së Bashkuar që nga viti 2013 dhe ka shërbyer si anëtar i Grupit Këshillëdhënës Shkencor për Emergjenca (SAGE), organi kryesor për ofrimin e këshillave për qeverinë e Mbretërisë së Bashkuar rreth menaxhimit të pandemisë.
© KOHA. Të gjitha të drejtat janë të rezervuara.
