Planin e njëjtë për fillimin e zbatimit të Ligjit të sigurimeve shëndetësore, sikur qeveritë e kaluara, e ka edhe Qeveria Kurti.
Në emisionin DESKU të KTV-së, ministri i Shëndetësisë, Rifat Latifi, ka paralajmëruar se fillimisht do të mblidhen paratë nga qytetarët, e më pas do të bëhet fillimi i sigurimeve shëndetësore.
“Ne në fillim të vitit 2023 do të fillojmë t’i mbledhim premiumet për këtë, dhe unë besoj që këtë vit do të kemi të paktën fillimin e zbatimit të sigurimeve shëndetësore”, ka thënë Latifi.
E një plan të tillë, që fillimisht të mblidheshin kontributet ose premiumet nga qytetarët e pastaj të kontraktohen shërbimet, e kanë pasur edhe qeveritë e kaluara.
Në vitet 2016 e 2017, kur kryeministër ishte Isa Mustafa disa herë Qeveria e Kosovës pati vendosur për fillimin e mbledhjes së premiumeve, ani pse ofrimi e kontraktimi i shërbimeve nuk ishte gati.
Por, Lëvizja Vetëvendosje asokohe e kundërshtonte fuqishëm një ide të tillë, me argumentin se është e jashtëligjshme.
“Para se të fillojë vjelja e parave të qytetarëve për sigurime ata duhet publikisht të njoftohen për përfitimet që do të kenë në përmirësimin e ofrimit të shërbimeve shëndetësore”, kishte thënë më 2016 Visar Ymeri, kryetar i VV-së në atë kohë.
Muhamedali Kodra nga Shoqata e Pacientëve është skeptik për deklaratën e ministrit për mbledhjen e premiumeve. Ai thotë se paratë është e lehtë të mblidhen, por problemet nisin te kontraktimi i shërbimeve shëndetësore.
“Unë konsideroj që nuk jemi aspak të përgatitur. E kemi një fond me vetëm 50 punëtorë, e nuk e di sa janë të trajnuar. Nuk kemi pako të shërbimeve të dizajnuar - pakon bazike. Nuk kemi pothuajse asgjë të përgatitur”, ka deklaruar Kodra.
Ligji për sigurime shëndetësore ka kaluar në vitin 2014. Dy vjet më vonë ka nisur puna në amendamentimin e tij, porse nuk është kryer ende.
Një nga ankesat e opozitës së atëhershme, që sot e drejton shëndetësinë, është vlera e pagesave prej 7 për qind për punëtorët, nga të cilat, gjysma do të paguheshin nga ta gjysma tjetër nga punëdhënësi.
Ligji aktualisht është në proces të plotësim-ndryshimeve, por në draftin e tij nuk përmendet korrigjimi i vlerës së pagesës. Në draft-ligjin e publikuar në faqen e Kuvendit të Kosovës është shtuar një nen që ka të bëjë me gjobat për subjektet që nuk i japin shtetit informatat për personat e siguruar.
Kosova mbetet një nga vendet e rralla në Evropë pa sigurime shëndetësore, ndonëse secila qeveri e subjekt politik e premton në fushata zgjedhore.
© KOHA. Të gjitha të drejtat janë të rezervuara.
