Arbëri

Para Komisionit Hetimor për Energjinë do të dalë edhe ambasadori Berishaj

Foto: Alban Bujari / KOHA
 

Gjatë një mbledhjeje të Komisionit Hetimor për Energjinë, kryesuesi Driton Selmanaj ka bërë të ditur se në mesin e të ftuarve do të jetë edhe ambasadori i Kosovës në Kroaci, Martin Berishaj. E, deputetë të subjektit kryesor në pushtet kanë propozuar që listës së të intervistuarve t’i shtohen edhe kryetarët e partive politike. Deri të hënën, ligjvënësit do të mund t’i deponojnë emrat e njerëzve që duhet të dalin para komisionit

Kryetarë të partive politike, ambasadorë, Avokati i Popullit, përfaqësues të dikastereve qeveritare dhe institucioneve të pavarura do të ftohen për t’u intervistuar nga Komisioni Hetimor për menaxhimin e krizës energjetike nga Qeveria, ka bërë të ditur të premten kryesuesi i tij, Driton Selmanaj.

Gjatë një mbledhjeje që e ka mbajtur ky trup hetimor i formuar nga Kuvendi është përmendur lista e gjatë e personave që duhet të japin dëshmi. Ndërkaq ka pasur propozime edhe nga anëtarë të Komisionit e të cilët deri të hënën do ta kenë mundësinë që të dërgojnë me shkrim të gjitha propozimet për personat që duhet të ftohen për intervistë në Komision.