“Non-paperi” i fundit për vendet e Ballkanit Perëndimor vjen nga Austria dhe nuk është si të tjerët paraprak, ku flitej për shkëmbime të territoreve e marrëveshje që mund të nxisin luftë.
“Non-paperi” austriak, të cilin e ka siguruar portali nga Sarajeva “Klix”, i rekomandon Bashkimit Evropian anëtarësimin gradual të vendeve të Ballkanit Perëndimor, ku përfshihet edhe Kosova.
“Non-paperi” është shkruar në maj të këtij viti dhe si shkas është marrë lufta në Ukrainë, përkatësisht rreziku që vjen nga Rusia.
Në hyrje të dokumentit, thuhet se agresioni rus kundër Ukrainës ka ndryshuar rrethanat gjeopolitike, ka rrezikuar politikën e "Fqinjësisë Lindore" të Bashkimit Evropian dhe mund të ketë pasoja negative për stabilitetin e Ballkanit Perëndimor.
"Ne duam dhe kemi nevojë për vendet e këtij rajoni në anën tonë. Ata janë një partner kyç dhe një pjesë integrale e familjes sonë evropiane. Për këtë arsye, ne duhet të rimendojmë qasjen tonë ndaj procesit të zgjerimit dhe politikës sonë fqinjësore", thuhet në dokument.
“Non-paperi” austriak thotë se zgjerimi i Bashkimit Evropian duhet të përdoret si instrument gjeostrategjik dhe jo thjesht si një procedurë burokratike. Austriakët theksojnë se procedura aktuale e zgjerimit nuk ka dhënë rezultate të rëndësishme.
"Në rrugën drejt anëtarësimit të plotë, ne duhet të krijojmë mundësi për integrimin gradual të këtyre vendeve në fushat me përfitim të veçantë për to", thuhet tutje.
Si propozime për integrim më të shpejtë të këtyre vendeve janë dhënë: integrimi progresiv në tregun e përbashkët të përmes, transporti i lirë i mallrave, ulja dhe heqja e tarifave doganore, që do të përfshinin produktet bujqësore dhe lëvizja e lirë e punëtorëve.
Në “Non-paper” thuhet po ashtu se qasja graduale në fondet e BE-së do të përdoret si mjet bazë për të inkurajuar reformat. Gjithashtu, duhet të lihet mundësia e anulimit të disa përfitimeve në rast të devijimit nga rruga evropiane.
“Non-paperi” është term për t’iu referuar letrës, e cila nuk është zyrtare. Në gjuhën diplomatike, një “Non-paperi” përdoret kur një qeveri i përcjell një çështje qeverisë/qeverive ose akterëve të tjerë të një shteti, ndërsa nuk mban asgjë të regjistruar.
© KOHA. Të gjitha të drejtat janë të rezervuara.
