Kancelari gjerman, Olaf Scholz, ka thënë të jetë në pikëpyetje mbajtja e Samitit të vendeve të Ballkanit Perëndimor me ato të Bashkimit Evropian, që është paraparë për të enjten paradite në Bruksel. Gjatë një adresimi në Bundestag, Scholz ka folur me tone kritike për qasjen që BE-ja është duke e treguar në raport me procesin e zgjerimit.
“Unë po e them shumë qartë: Shpresoj që Samiti të mbahet. Sipas informatave tona, nuk është e sigurt që do të mbahet”, ka thënë kancelari Scholz të mërkurën. “Që të jem i sinqertë, kjo nuk më çudit. Sepse kur ngjall shpresa, kur i ke futur këto vende në një rrugë dhe kur i bind se ia vlen që të ecin në rrugën drejt BE-së, dhe ata i bëjnë të gjitha përpjekjet, rrezikojnë konflikte politike brenda vendit, madje, një vend, Maqedonia e Veriut, ndryshon edhe emrin që të mos jetë në grindje me Greqinë, atëherë është konsekuente që vendimmarrësit dhe qytetaret dhe qytetarët e tyre ta shprehin pakënaqësinë që kanë”.
E nëse Samiti do të mbahet, kancelari gjerman ka thënë se ai nuk do të jetë i lehtë.
Por ka thënë se për Gjermaninë është e rëndësishme që të pozicionohet. Dhe ka shprehur qëndrimin se shteti që përfaqëson është në anën e tyre.
Më parë kancelari socialdemokrat ishte shprehur për heqjen e parimit të unanimitetit në politikën e jashtme të BE-së dhe kishte thënë se, sikurse Ukraina dhe Moldavia që do të marrin një përgjigje të fortë ndaj kërkesës së tyre për status kandidati, edhe vendet e Ballkanit Perëndimor meritojnë një përgjigje të qartë.
“Kjo është arsyeja pse ishte e rëndësishme për mua të vizitoja rajonin përpara udhëtimit tim në Ukrainë”, ka thënë ai.
Politikani socialdemokrat përshkroi me ton dhe fjalë emocionale, të pazakonta për të, gjendjen në të cilën ndodhet Ballkani Perëndimor tani, dhe ka sjellë para deputetëve një mbresë që kishte marrë nga takimi i fundit me liderët e shteteve të Ballkanit në Selanik.
“Kanë kaluar gati 20 vjet qëkur në Selanik BE-ja u ofroi këtyre vendeve perspektivën e anëtarësimit. Unë isha atje para disa ditësh. Dhe të gjithë ma kujtuan këtë, se si u vendos. Atëherë në Selanik të gjithë mendonin se do të ishin anëtarë të BE-së pas pesë ose tetë vjetësh. Dhe kjo nuk është realizuar deri më sot”, ka thënë kancelari Scholz.
Ai ka thënë se ka ardhur koha që Ballkani Perëndimor duhet të jetë në BE dhe se këtë mesazh e ka përcjellë gjatë udhëtimit në rajon. Sipas kancelarit Scholz, ky duhet të jetë mesazhi që duhet të dalë nga takimi i së enjtes i BE-së me gjashtë vendet e Ballkanit Perëndimor.
© KOHA. Të gjitha të drejtat janë të rezervuara.
