Për një vit e gjysmë të Qeverisë Kurti janë zotuar mbi 50 milionë euro blerje të armatimit, ka thënë ministri i Mbrojtjes, Armend Mehaj, në një përgjigje ndaj Lidhjes Demokratike të Kosovës që e akuzoi këtë ministri për mungesë të realizimit të investimeve kapitale.
Mehaj ka thënë se këtë shumë nuk e ka ndarë asnjë qeveri më herët. Ai ka pranuar se bëhet fjalë për zotim të mjeteve. Ndërkaq s’ka treguar se çfarë armatimi është blerë.
Tutje ministri Mehaj ka thënë se gjatë mandatit të tij janë rekrutuar 1240 ushtarë të rinj e së shpejti do të hapet konkursi edhe për 612 ushtarë aktivë e 367 rezervë. “Kjo nuk ka ndodhur në asnjë qeverisje tjetër”.
Sipas Mehajt, deri tash janë zotuar 28.6 për qind e buxhetit për blerje. Ka thënë se përqindja do të dyfishohet brenda javëve të ardhshme, “kur do të përmbyllen blerjet që janë në proces”.
“Ministria e Mbrojtjes, vitin që lëmë pas ka shpenzuar 96% të buxhetit, njëherit përqindja më e lartë e shpenzimit të buxhetit ndonjëherë. Këtë nivel do ta mbajmë edhe në vazhdim”, ka deklaruar Mehaj.
Buxheti i Ministrisë së Mbrojtjes është pak mbi 100 milionë euro.
© KOHA. Të gjitha të drejtat janë të rezervuara.
