1 perditesime
17:34

Kurti për targat: Nuk ka mënyrë tjetër pos zbatimit të vendimit

Kryeministri Albin Kurti, ka thënë se janë dy palë në vend, në njërën anë Kosova demokratike dhe në tjetrën, në veri, strukturat ilegale të Serbisë.

Ai ka thënë se nevojitet mbështetja e BE-së, NATO-s dhe shteteve perëndimore për ta vazhduar luftën kundër krimit të organizuar dhe korrupsionit.

“Nëse mendohet për dy palët, kemi shtetin demokratik të Kosovës, policinë profesionale dhe në palën tjetër kemi struktura të paligjshme të Serbisë që janë kthyer në banda kriminale që kanë ngritur edhe barrikada. Mund të thuhet se janë dy palë, por nuk mund ta humbin busullën morale. Nuk mund të shmangim politikat e vendosura, duhet të ketë zero tolerancë ndaj krimit dhe korrupsionit. Na duhet mbështetja nga BE-ja, NATO, perëndimi demokratik për një vend demokratik si Kosova. E di që janë 4 shtete që nuk na kanë njohur, nuk është e lehtë, por gjithmonë do të insistoj për atë që është e drejtë dhe e nevojshme”, tha Kurti në konferencën me shefin e NATO-s. 

Kurti është pyetur nëse është e mundur tërheqja nga vendimi për targat. Ai theksoi se Kosova po kryen obligimin ligjor, sipas të drejtës së saj.

“Më 29 qershor kemi marrë vendim për t’i mundësuar qytetarëve serbë tabela të regjistruara që janë trashëgimi e Millosheviqit të prodhuara në Serbi, me akronime të qyteteve në Kosovë, që t’i konvertojnë në tabela legjitime. Në këtë drejtim kemi filluar fushatë për të informuar qytetarët serbë dhe kemi krijuar një stimul financiar që gjatë konvertimit qytetarët serbë nuk do duhet të paguajnë TVSH apo doganën që mund të shkojë deri në 5 mijë euro. Vetë Serbia është pajtuar që që prej janarit 2018 nuk do prodhojnë tabela të tilla në Serbi dhe nuk do t’i detyrojnë serbët t’i përdorin. Katër vite më vonë po implementojmë diçka që është në pajtim me Kushtetutën dhe ligjet tona. Duke qenë në përputhje me zotimet e Serbisë dhe obligimet e tyre gjatë negociatave në Bruksel, pra nuk ka mënyrë tjetër dhe është në dobi të të gjithëve të bëjmë çdo gjë legjitime”.

17:17

Kurti i kërkon Stoltenbergut anëtarësimin e Kosovës në NATO

Kryeministri i Kosovës, Albin Kurti, ka thënë gjatë një konference të përbashkët me Sekretarin e Përgjithshëm të NATO-s, Jens Stoltenberg, të mërkurën në Bruksel, se Kosova kërkon anëtarësimin në NATO.

Kurti ka thënë se kërcënimet dhe rreziqet e sfidat që NATO-ja i përballon sot, ndjehen edhe nga Kosova.

“Kemi një vizion të qartë, ne kërkojmë anëtarësim në NATO dhe kjo do të na mundësojë që të japim atë që vendet anëtare na kanë dhënë ne. Kërcënimet rreziqet dhe sfidat që NATO-ja i përballon sot ndjehen edhe nga vendi jonë. Institucionet kanë arsye të jenë vigjilente ndaj agjendës së dëmshme ruse për Ballkanin dhe Evropën. Qeveria dhe populli i Kosovës e mirëpret besimin dhe përkushtimin tuaj për paqe të qëndrueshme dhe sigurinë”, ka thënë Kurti.

Shefi i NATO-s, Jens Stoltenberg, ka përsëritur ato që ka thënë në takimin me presidentin serb, se KFOR-i është në gatishmëri në rast se cenohet stabiliteti.

“Misioni paqeruajtës i KFOR-it është atje dhe komandanti ka kontaktuar me organizatat e sigurisë në Kosovë dhe shefin e mbrojtjes në Serbi. KFOR-i është i gatshëm për të ndërhyrë nëse stabiliteti rrezikohet. KFOR-i ka më shumë se 3.700 trupa. Jemi plotësisht të përkushtuar ndaj mandatit tonë dhe rezolutës 1244. KFOR-i do vazhdojë të ofrojë mjedis të sigurt dhe lëvizje të lirë për popullin në Kosovë”, tha ai.

Stoltenberg: Siç e demonstruam në veri, prapë rrisim trupat e NATO-s në rast përshkallëzimi

Sekretari i Përgjithshëm i NATO-s, Jens Stoltenberg, ka thënë se fakti që NATO-ja është në Kosovë me gati 4000 trupa tregon përkushtimin dhe gatishmërinë e ndërhyrjes në rast të rrezikimit të stabilitetit në vend.

Ai theksoi se prania e trupave ndërkombëtare ndihmon në depërshkallëzimin e situatës. Teksa shtoi se ashtu siç e ka demonstruar shumë herë, NATO-ja mund të zbarkojë e të rrisë praninë e trupave në rast rreziku.

“NATO-ja është në Kosovë me gati 4000 trupa dhe është prania më e madhe ushtarake jashtë territorit të NATO-s. Shprehim përkushtim tejet të madh për paqen dhe stabilitetin në Ballkanin Perëndimor, për Kosovën. Trupa të trajnuar, të udhëhequr mirë, forcat e NATO-s, vetëm prania e tyre ndihmon në deeskalim apo depërshkallëzim. Kur është e nevojshme e kemi demonstruar shumë herë se mund të zbarkojmë dhe të rrisim praninë tonë, për shembull si në veri atë që e kemi bërë në javët e fundit. Mund ta rrisim prapë praninë tonë dhe kemi patrulla të rregullta të KFOR-it në veri”, tha ai.

Stoltenberg shprehu bindshëm se aleanca ushtarake do të bëjë gjithçka të mundur për ta parandaluar çfarëdolloj përshkallëzimi në Kosovë.

“Veprimet tona do jenë proporcionale, të matura, por të qarta dhe do bëjmë çdo gjë të nevojshme për të parandaluar çfarëdo lloj përshkallëzimi dhe për të siguruar lirinë e lëvizjes. Ajo që e kemi dëshmuar shumë herë e demonstron atë që NATO-ja arrin ta bëjë atë që është e nevojshme kudo dhe atë ku është e domosdoshme”.