Analizë e dënimeve: Një vit burgim dhunuesit të vajzës 11-vjeçare të gruas, vite më vonë dhunoi renë
Gjykatat në Kosovë shqiptojnë dënime të buta për trafikantët e vajzave të mitura, dhunuesit recidivistë dhe sulmuesit seksualë. KOHA ka analizuar disa nga aktgjykimet e nxjerra muajt e fundit. Një 21-vjeçare, në muajin e pestë të shtatzënisë është dhunuar nga vjehrri i saj, i cili në vitin 2017 ishte dënuar me 1 vit burg për dhunimin e vajzës 11 vjeçe të gruas së tij. Një vrasës që është në mbajtje të dënimit, tek sivjet është dënuar me vetëm 6 muaj burg, për trafikimin e një të miture një dekadë më parë, e një burrë është dënuar me kusht, ani se kishte tentuar ta dhunonte një vajzë.
Aktgjykimet e nxjerra vetëm për 3 muaj në Gjykatat Themelore anembanë Kosovës flasin për dënime të buta e shpesh edhe me kusht për dhunuesit e vajzave të mitura.
KOHA ka analizuar disa të tilla.
Një vajzë e mitur në vitin 2012 kishte rënë në duar të një trafikanti, i cili në këmbim të parave ua ofroi atë burrave për shërbime seksuale.
Një burrë i moshës madhore, edhe pse e dinte që vajza ishte e mitur dhe po trafikohej, për disa muaj ka abuzuar seksualisht viktimën. Institucionet e drejtësisë asokohe nuk u morën seriozisht me rastin e më pas i njëjti vrau një person dhe është në vuajtje të dënimit prej 12 vjetësh në Burgun e Dubravës.
Pas dhjetë vjetësh Gjykata Themelore në Prizren vendosi për rastin e trafikimit. Trafikantin, që më pas u bë vrasës, trupi gjykues e dënoi me 6 muaj burgim, dënim që mund të zëvendësohet me 3 mijë euro gjobë.
Gjyqtarja e rastit listoi në aktgjykim rrethanat lehtësuese për dhunuesin.
“Prej rrethanave lehtësuese mori parasysh faktin se i njëjti e ka pranuar fajësinë, pendimin për veprën penale të kryer, rrethanën personale se është familjar, i ati i 5 fëmijëve, se nga kryerja e veprës penale ka kaluar më shumë se 10 vjet dhe se në atë kohë i akuzuari ka qenë relativisht i ri, ndërsa prej rrethanave rënduese faktin se gjendet në vuajtje të dënimit në Burgun e Dubravës për shkak të veprës penale të vrasjes, është i dënuar me dënim me burgim në kohëzgjatje prej 12 vjetëve”, thuhet në aktgjykim.
Një aktgjykim tjetër dëshmon se çfarë ndodh kur dhunuesit dënohen me dënime të lehta.
Në shtatorin e vitit 2021, një 21 vjeçe ishte në muajin e pestë të shtatzënisë. Atëkohë ishte dhunuar nga i vjehrri.
Gjykata Themelore në Gjilan, në maj, e ka dënuar me 6 vjet burg dhunuesin e së resë. Por, aktgjykimi dëshmon që ai ishte recidivist. Në 2017-n ai është dënuar, meqë nëntë vjet më parë e kishte dhunuar një 11-vjeçare, e cila ishte vajza e gruas së tij.
Djali i dhunuesit kishte thënë në gjykatë se e kishte pritur që i ati ta përsëriste krimin.
“Një gjest të tillë e ka bërë edhe më herët, ka pasur rast dhunimi dhe madje për shkak se i njëjti e ka dhunuar çikën e nënës sime, e cila ka qenë 11-vjeçare, kjo ka ndodhur në vitin 2008 dhe është dënuar me 1 vit burgim”, ka thënë djali i dhunuesit.
Në aktgjykim thuhet që pikërisht pse ishte i dënuar edhe më herët ia kanë shqiptuar dënimin prej 6 vjetësh.
Për një rast të sulmit seksual, në muajin mars të këtij viti, Gjykata Themelore në Prizren ka shqiptuar vetëm dënim me kusht. Sulmuesi e kishte marrë një vajzë për ta dërguar në shtëpinë e saj në Shtime, por rrugës kishte tentuar ta dhunonte, por viktima pati arritur të ikte.
Në aktgjykim është përshkruar momenti dramatik.
“I njëjti (i dyshuari v.j.) vazhdon me prekje afër zonës intime duke iu drejtuar me fjalët se ‘fillo t’i heqësh rrobat, deshu se të kapi me dhunë, kena m’u nal diku te pishat me krye marrëdhënie seksuale se badihava nuk të çoj në Shtime’, dhe me të parë këtë situatë e dëmtuara nga frika fillon të qajë e më pas e hap derën e automjetit derisa ishte në lëvizje dhe kërcen nga automjeti duke u zvarritur përtokë”, thuhet në aktgjykim.
Trupi gjykues ka renditur shumë rrethana lehtësuese për ta arsyetuar vendimin për dënim me kusht në këtë rast.
“Gjatë përcaktimit të llojit dhe lartësisë së dënimit gjykata për të akuzuarin aplikoi dispozitat për zbutjen e dënimit të neneve 71 dhe 72, andaj me rastin e zbutjes së dënimit mori parasysh se e ka pranuar fajësinë në seancën e shqyrtimit gjyqësor, se ndihet i penduar dhe se i ka premtuar gjykatës se nuk do të përsërisë vepra të tilla apo të ngjashme penale, se me të dëmtuarën i kanë përmirësuar raportet, janë pajtuar, nuk kanë asgjë të keqe, ka qenë bashkëpunues me gjykatën, ndërsa si rrethanë rënduese gjykata gjeti mënyrën e kryerjes së veprës penale”, thuhet në aktgjykim.
Rastet e raportimit të dhunës seksuale janë rritur ndjeshëm viteve të fundit e institucionet e drejtësisë kritikohen për dështim në mbrojtjen e viktimave dhe për vënien e drejtësisë për to.
