Partia Social Demokrate (PSD) ka vendosur të martën, në shenjë proteste, një baner në rrethojat e Ministrisë së Shëndetësisë, me mbishkrimin “Qu prej gjumit ministër”. Kjo parti po ashtu ka lëshuar tinguj alarmi pranë kësaj ministrie, si formë për “ta zgjuar ministrin nga gjumi”.
Natyra Kuçi, nga kjo parti ka thënë para gazetarëve pas vendosjes së banerit se ministri Rifat Latifi nuk e ka përmbushur asnjë prej premtimeve të veta kur ka ardhur në krye të Ministrisë së Shëndetësisë.
“Ministri Latifi se ka përmbushur asnjë prej premtimeve të veta. Thoshte që ditës duhet t’i zgjasim edhe dy orë në mënyrë që ta kemi 26 orë ditën. Le të zgjohet nga gjumi dimëror në të cilin ka rënë. Le të zgjohet dhe ta kuptojë se ne i kemi 48 anesteziologë në vend të 140, i kemi në mungesë 4,000 infermierë nëse krahasohemi me vendet fqinje. E kemi një infermiere që kujdeset për diku rreth 30 pacientë. Le te tmerrohet ky ministër nga mungesa e barnave, infrastrukturës dhe aparateve për të funksionuar një spital normal. Duke qenë se gjendja është emergjente në shëndetësinë në Kosovë ne po e lëshojmë një alarm dhe po i themi ministrit zgjohu nga gjumi dhe puno”, ka thënë Kuçi.
© KOHA. Të gjitha të drejtat janë të rezervuara.
