Kompensimi i orëve mësimore midis kërkesës dhe refuzimit
Zëvendësimin e orëve mësimore të humbura nga greva ka kërkuar Ministria e Arsimit, një ditë para fillimit të viti të ri shkollor. Në Sindikatën e Bashkuar të Arsimit thonë se nuk kanë ndërruar qëndrim. Ndërkaq institucionet arsimore shprehen të gatshme për zëvendësimin e tyre.
Mobilizim të mësimdhënësve kërkoi të dielën Ministria e Arsimit për të plotësuar humbjet e shkaktuara nga greva.
Për qindra mijëra orë mësimore të humbura, MASHTI paralajmëroi se të hënën do të formojë një grup punues për rishikimin e kalendarit shkollor.
Sindikata e Bashkuar e Arsimit është shprehur kundër zëvendësimit të orëve mësimore.
Ata janë thirrur në kontratën kolektive të nënshkruar mes Sindikatës dhe Ministrisë në vitin 2021, ku thuhet se “orët mësimore të humbura gjatë grevës nuk zëvendësohen, përveç nëse palët nënshkruese të kësaj kontrate arrijnë marrëveshje të veçantë”.
“Zonja Nagavci duhet të presë të fillojë mbarë e hëna dhe pastaj të ulemi të bisedojmë, por ajo që dihet është që me kontratë kolektive që është nënshkruar nga MASHTI dhe SBASHK-u e thotë qartë se orët e humbura në grevë nuk kompensohen”, ka thënë kryetari i SBASHK-ut, Rrahman Jasharaj.
Pas një muaji vonesë, të hënë do të fillojë viti i ri shkollor, pasi 54 për qind të mësimdhënësve votuan për pezullim të grevës deri në janar të vitit 2023.
Dyert për nxënësit do t’i hapë të hënën edhe gjimnazi “Ahmet Gashi” në kryeqytet, të cilët ishin për vazhdim të grevës.
Nga drejtori i këtij gjimnazi, Haxhi Metaj, nuk është parë problematike kompensimi i orëve të humbura, pasi ai thotë se mund të përdorin praktikën e njëjtë si në vitet paraprake kur mësimi ka filluar me vonesë për shkak të pandemisë.
“Unë besoj që po, besoj që gjysmëvjetori shtyhet një javë, gjithashtu me pushimin pranveror dhe dy javë deri në fundvit shkollor. Kështu kemi vepruar edhe vitet paraprake, për shkak se tri vitet e fundit ne kemi filluar zakonisht me datën 27 shtator, për shkak të pandemisë dhe kësaj gjendjes”, ka thënë Metaj.
Të gatshëm të japin maksimumin për të zënë hapin me mësime janë shprehur edhe në shkollën fillore “Gjergj Fishta”.
“Dëmet në esencë në pamje të parë gjithmonë në arsim nuk shihen, ato ndihen më vonë... Për aq sa kemi kompetencat do të provojmë që ato dëme t’i zbusim dhe me qenë sa më të pakta”, ka thënë Supije Zhitija, drejtoreshë në SHMFU “Gjergj Fishta”.
Kundër kompensimit të orëve janë shprehur prindërit. Në fillim të shtatorit, Këshilli i Prindërve i Kosovës ka njoftuar se nuk do t’i dërgojnë fëmijët në shkollë gjatë ditëve të fundjavës. Ata kanë vlerësuar se mësimi gjatë ditëve të shtuna nuk është i efektshëm në mësim-nxënie.
Që nga 25 gushti, mësimdhënësit kanë qenë në grevë të përgjithshme, me kërkesën për shtesë mbi pagë në vlerën e 100 eurove. Ata tani kërkojnë që Ligji për Paga të hyjë në fuqi në muajin janar.
