Arnisa Osmani nga Organizata joqeveritare “Have Hope”, ka bërë thirrje për të gjitha gratë që të kryejnë kontrolle të gjirit, jo vetëm gjatë tetorit – muajit të ndërgjegjësimit - por edhe gjatë muajve të tjerë të vitit.
Gruaja, e cila e mposhti kancerin e gjirit, ka thënë se kjo sëmundje nuk jep shenja dhimbjeje apo simptoma të tjera derisa të kalojë në një fazë më të rëndë, që do të mund të jetë edhe e vonshme për shumë gra.
Ajo ka njoftuar se gjatë “muajit rozë”, organizata që e drejton do të japë ligjërata për vetëdijesim dhe motivim në të gjitha komunat.
“Do të japim ligjërata për vetëdijesim dhe motivim nëpër komuna. Nuk është vetëm muaji tetor për kontrolle. Kisha apeluar te të gjitha gratë se është një sëmundje që nuk ka shenja, nuk dhembë, nuk ka simptoma të mëdha derisa të kalojë në një fazë të tretë apo të katërt”, ka thënë ajo të hënën në emisionin SOT në KTV.
Nga përvoja e saj personale, Osmani ka treguar se nuk është aspak e lehtë të pranohet fjala “kancer” pas diagnostikimit, por se duhet luftuar për ta mposhtur atë.
“Nga eksperienca personale e para katër vjetëve, kam shkuar te mjeku më ka thënë se është një gjëndër 99 për qind e keqe, 1 për qind e mirë. Nuk është aspak e lehtë ta pranosh. Herën e parë nuk është përdorur fjala kancer tek unë pa e ditur sigurt se çfarë ka Arnisa dhe pas biopsisë është definuar. I kam premtuar vetes se do të luftojë. Kanceri është larguar, por e sëmurë nuk kam qenë asnjëherë. Emocionalisht mund të jesh më ndryshe sepse për pesë minuta mund të të ndryshojë jeta, pas një kontrolli te mjeku. Andaj kontrollet duhet bërë jo vetëm kur të vëreni diçka, por edhe më shpesh”, ka thënë ajo.
Osmani ka rrëfyer se rënia e flokëve dhe largimi i gjirit janë pjesa më e rëndë e gjithë procesit në të cilën kalon një grua pas diagnostikimit me kancer.
“Nuk është lehtë, kalon në një fazë të vështirë si fizike edhe emocionale, por duhet luftuar që në fund të ketë një betejë të fituar”, ka thënë ajo.
Derisa foli për organizatën të cilën e drejton, Osmani tha se qëllimi i kësaj OJQ-je është t’u ndihmojë pacientëve moralisht.
“Organizata e ka qëllim t’u ndihmojë pacientëve moralisht sepse kanë nevojë për të biseduar. Ka shumë gra që hezitojnë të flasin si me miq edhe me familjarë të vet. Sivjet do të shpërndahen në Onkologji proteza dhe paruke. Ka edhe donatorë të tjerë që kanë shprehur dëshirën për të ndihmuar gratë e atakuara prej kancerit në Klinikën e Onkologjisë”, ka thënë ajo.
© KOHA. Të gjitha të drejtat janë të rezervuara.
