Kurti pret përfaqësuesin special të Norvegjisë për Ballkanin Perëndimor, flasin për dialogun
Kryeministri i Kosovës, Albin Kurti, ka pritur të hënën në takim Përfaqësuesin Special të Norvegjisë për Ballkanin Perëndimor, Arne Sannes Bjornstad, bashkë me ambasadorin norvegjez në Kosovë, Jens Erik Grondahl.
Në takim, sipas njoftimit, është diskutuar për marrëdhëniet midis Kosovës dhe Serbisë.
Në njoftimin e Zyrës së kryeministrit, thuhet se Kurti e ka njoftuar Bjornstadin se Kosova është treguar palë konstruktive në procesin e dialogut.
“Me Përfaqësuesin Special të Norvegjisë për Ballkanin Perëndimor, Bjørnstad u diskutua edhe për marrëdhëniet ndërmjet Kosovës dhe Serbisë. Përmes gatishmërisë për takime, vullnetit për marrëveshje dhe propozimeve konkrete, Republika e Kosovës është treguar se është palë konstruktive në procesin e dialogut drejt marrëveshjes ligjërisht të obligueshme që në qendër ka njohjen reciproke”, thuhet të ketë thënë Kurti.
Në diskutimet e këtij takimi zuri vend edhe Procesi i Berlinit.
“Në prag të Samitit të Berlinit, kryeministri Kurti tha se shpreson për një rifillim të Procesit të Berlinit nën udhëheqjen e kancelarit gjerman, Scholz që do të sillte tregun e përbashkët rajonal dhe BE-në si vlerë dhe mekanizëm brenda gjashtë vendeve të Ballkanit Perëndimor”, thuhet tutje në njoftim.
Gjatë takimit raportohet të jetë biseduar edhe për raportet ndërmjet Kosovës dhe Norvegjisë dhe rolit mbështetës të këtij vendi në zhvillimin e Kosovës dhe synimet integruese euro-atlantike të saj.
