Arbëri

Analizat në dorë laborantëve, specialistët refuzojnë QKMF-të

 

Të gjitha analizat e qytetarëve të Komunës së Vushtrrisë që kryhen në spital dhe në Qendrën Kryesore të Mjekësisë Familjare realizohen pa specialistë të biokimisë dhe me teknikë laborantë. Mungesë të specialistëve të biokimisë kanë raportuar edhe në disa komuna të tjera. E krejt kjo, sipas tyre, po ndodh ngaqë mjekët, pas specializimit në fushën e biokimisë, e synojnë punësimin në Qendrën Klinike dhe Universitare dhe e refuzojnë angazhimin nëpër qendra kryesore të mjekësisë familjare

Të gjitha analizat laboratorike në Qendrën Kryesore të Mjekësisë Familjare në Vushtrri, prej qershorit janë kryer pa specialist të biokimisë, kanë konfirmuar nga kjo qendër, pas ngritjes së shqetësimeve nga qytetarët.

Drejtoresha Naile Xhaka, ka pranuar se gjatë periudhës pesëmujore të këtij viti, 25 analiza janë kryer vetëm me teknikë të laboratorit dhe se kjo ka ndodhur shkaku që gjatë kësaj periudhe, shefi i diagnostikës ka qenë në arrest shtëpiak, nën dyshimin për keqpërdorim të detyrës zyrtare. Për të njëjtën arsye ishin suspenduar edhe dy teknikë laboratorikë.