Personalitetet e vitit 2022: Rifat Latifi – Air-ministri
Është nga mjekët me karrierën me të bujshme, të cilit iu dha mundësia të udhëhiqte me shëndetësinë. Pasi u emërua ministër, Rifat Latifi premtoi reformë të thellë në sektor, por nuk iu panë rezultate dhe pas dhjetë muajsh në funksion, u dorëhoq.
Latifi për këtë kohë nuk la asnjë gjurmë në avancimin e shëndetësisë publike. U bë i njohur kryesisht për udhëtimet e shpeshta jashtë vendit, për të cilat thoshte se ishin në shërbim të “diplomacisë shëndetësore”. Dhe, u bë lajm për fjongon e kaubojkat.
Ish-ministri foli shumë për kthimin e trurit, por nuk arriti ta kthente në Kosovë asnjë mjek që punon jashtë vendit. Foli edhe për 14 qendrat e ekselencës si qendra të avancuara të mjekësisë, por për 10 muaj nuk arriti të stabilizojë as furnizimin me barna. E mori mandatin në kohën kur në mjekësinë parësore nuk pati as infuzione, e për dhjetë muaj nuk arriti ta zgjidhte as këtë problem.
Latifi nuk siguroi komunikim të mirë brenda institucioneve të shëndetësisë. Nuk foli thuajse fare me sekretarin e përgjithshëm të Ministrisë e takimet me bordin e SHSKUK-së i pati të rralla.
