Donjeta Ajvazi nga Instituti i Kosovës për Drejtësi (IKD), në emisionin “Sot” të KTV-së ka thënë se sipas statistikave të tyre deri në vitin 2020 kanë qenë rreth 11 mijë persona që nuk e kanë plotësuar kriterin ligjor për 15 vjet përvojë pune para luftës, për të përfituar pensionin kontributdhënës.
“Sipas statistikave që ne i kemi deri në vitin 2020 kanë qenë diku 11 mijë persona të cilët nuk kanë arritur të marrin pensionin kontribtpagues për shkak të këtij kriteri të përcaktuar, për shkak të mospërmbushjes së stazhit prej 15 viteve”, ka theksuar Ajvazi.
Por ky kriter i përcaktuar në Ligjin për skemat pensionale të financuara nga shteti dhe Udhëzimin Administrativ për kategorizimin e shfrytëzuesve të pensionit kontributpagues, pritet të hiqet, pasi në dhjetor të vitit të kaluar Gjykata Kushtetuese ka shpallur antikushtetuese nenet e këtyre dokumenteve ku përcaktohej ky kriter.
Kushtetuesja ka vendosur që punëtorëve që janë larguar nga puna nga regjimi serb në vitet ’90 të ju njihet stazhi kontributpagues. Por Ajvazi ka thënë se nuk e di se nëse pas ndryshimit të Ligjit, ai do të zbatohet në mënyrë retroaktive.
Ligji për skemat pensionale të financuara nga shteti tashmë është në procedurë të ndryshimit në Kuvend, ku nga Aleanca për Ardhmërinë e Kosovës është kërkuar që të largohen pikërisht këto nene.
© KOHA. Të gjitha të drejtat janë të rezervuara.
