Në Ditën e Përkujtimit të Gjenocidit ndaj Shqiptarëve në Kosovë, u përkujtuan civilët e vrarë 24 vjet më parë në fshatin Reçak, me ndezjen qirinjve në sheshin “Skënderbeu” në Prishtinë.
Qytetarë të shumtë i janë bashkëngjitur këtij aktiviteti në nderim të viktimave të gjenocidit në Kosovë.
Kryetari i Qendrës “Gjenocidi në Kosovë-Plagë e Hapur”, Bardhyl Mahmuti, deklaroi se dita e përkujtimit të viktimave të gjenocidit ka një numër të madh të aktiviteteve. Kjo nismë sipas tij, është ndërmarrë për të shënuar këtë ngjarje të rëndësishme.
“Shteti serb jo vetëm që nuk njeh krimet e gjenocidit që ka kryer në Kosovë, përkundrazi aplikon një logjikë të mohimit permanent. Kjo logjikë e vazhdueshme e shtetit serb për të mohuar krimin dhe gjenocidin dhe për ta sjellë para drejtësisë të gjithë zinxhirin nga koka komanduese deri tek ekzekutorët para drejtësisë plaga jonë do të mbetet e hapur dhe ne e kemi për obligim të ngremë zërin aq sa kemi fuqi, sepse nuk mund të shtet krimi më i shëmtuar që ka ndodhur në fund të shekullit 20 me popullin shqiptar të Kosovës”, ka thënë ai.
Sipas Mahmutit, mobilizimi sivjet është shumë më i suksesshëm sesa vitet paraprake.
Sot mund të themi se dita e gjenocidit të Kosovë është një ditë ndërkombëtare e dhimbjes së popullit shqiptar. Sot në orën 19:30 janë ndez qirinj për t’u përkujtuar të gjitha viktimat në të katër anët e globit dhe do të vazhdohet të ndizen qirinj në përputhje me orën 19:30 në vendet lokale. Në SHBA do të jenë disa orë më vonë dhe në vendet e tjera do të ketë gjithashtu në përputhje me orën lokale. Gjithkund ku ka shqiptarë në botë, por jo vetëm shqiptarë, sepse me iniciativën e Qendrës ‘Gjenocidi në Kosovë-Plagë e Hapur’, janë solidarizuar edhe shkrimtarë spanjollë e artisë spanjollë, regjisorë norvegjezë, edhe filozofë e realizatorë të ndryshëm danezë e Italinë. Kemi një mobilizim të gjithanshëm dhe ne si shqiptarë e kemi për obligim të ri-rreshtojmë të gjitha energjitë tona pa dallime partiake e ideologjike, rajonale, gjithkund ku jemi të mobilizohemi dhe të ngremë zërin për të ndëshkuar krimin e gjenocidit dhe të ndriçohen të gjitha aspektet e krimeve të gjenocidit, të ngremë zërin që të ngadhënjejë drejtësia”, ka thënë ai.
Për masakrën e Reçakut, ku janë masakruar mizorisht 45 persona, Ambasadori i SHBA-së në Kosovë, Jeffrey Hovenier, tha se nuk duhet të harrohet nga askush ajo çfarë ka ndodhur.
Hovenier ka thënë se është i vetëdijshëm se ka përpjekje për të rishkruar një histori shumë mirë të dokumentuar dhe për të shtrembëruar faktet. Por, ambasadori amerikan thotë se mohimi i këtyre krimeve dhe glorifikimi i krimeve të luftës, kthen rajonin prapa./ksp
© KOHA. Të gjitha të drejtat janë të rezervuara.
