Emisari i BE-së për dialogun Kosovë – Serbi, Miroslav Lajçak, ka falënderuar Spanjën “për mbështetjen e fortë për dialogun”.
Lajçak ka njoftuar në Twitter për takimin që ka pasur të hënën me ministrin e Jashtëm të Spanjës, Jose Manuel Albares.
“U takova sot me ministrin e jashtëm të Spanjës, Malbares, për ta përditësuar atë për gjendjen e lojës në dialog. Ne kemi nevojë për progres të shpejtë në këtë moment kritik drejt normalizimit të marrëdhënieve ndërmjet Kosovës dhe Serbisë. Mirënjohës për Spanjën për mbështetjen e fortë ndaj përpjekjeve të BE-së”, ka shkruar Lajçak në Twitter.
Lajçak ka shkruar edhe për takimin që ka pasur me ministrin e jashtëm të Sllovakisë, Rastislav Kaçer e me ministren e jashtme sllovene Tanja Fajon.
“E kam njoftuar për vizitën time të fundit dhe angazhimin tonë për normalizim të marrëdhënieve Kosovë – Serbi. E vlerësojnë përkrahjen e fortë të Sllovakisë ndaj të ardhmes së rajonit”, ka shkruar Lajçak për takimin me ministrin sllovak Kaçer.
E për takimin me Fajonin, ajo ka thënë se është “kyçe të mbahet rajoni lartë në agjendë e BE-së”.
Spanja e Sllovakia janë dy nga pesë shtetet e BE-së që ende nuk e kanë njohur pavarësinë e Kosovës. Në këtë mes janë edhe Rumania, Greqia e Qipro.
© KOHA. Të gjitha të drejtat janë të rezervuara.
