Hyseni: Qeveria është dashur ta ketë planin e vet për Asociacionin, jo t’i presë të tjerët
Flamur Hyseni, profesor i të drejtës në Universitetin e Prishtinës, ka kritikuar qasjen e Qeverisë së Kosovës që ka pasur në lidhje me Asociacionin, pasi siç thotë ai, është dashur që ekzekutivi të prezantonte një plan e jo t’i presë planet e të tjerëve.
Në një intervistë në “60 Minuta” të KTV-së, Hyseni ka thënë se formimi i Asociacionit nuk ka ndodhur për shkaqe politike, porse ka theksuar se është obligim që ka bazë që nga pakoja e Ahtisaarit.
“Diplomacia amerikane është më aktive se vitet e kaluara. Këto deklarata të tyre duhet kuptuar se janë mesazhe serioze dhe jo presione, pasi SHBA-ja nuk ka politikë presionuese ndaj kombit shqiptar. Ideja e Asociacionit është një lloj obligimi nga pakoja e Ahtisaarit, por ka pasur një histori pse nuk është bërë pas aktgjykimit të Kushtetuese. S’është bërë për shkaqe politike”, ka thënë ai.
Hyseni ka thënë se qëndrimi i Qeverisë karshi SHBA-së në këto momente lë shumë për të dëshiruar.
“Ky qëndrim neutral i Qeverisë aktuale karshi SHBA-së, lë për të dëshiruar, pasi Kosova duhet të bëjë veprime. Nuk është dashur të presim plane franko-gjermane, e plane të tjera për Asociacion, por do duhej t’i kryenim obligimet vetë. Qeveria është dashur me kohë të bëjë veprime, të dalë me një ide se çfarë dëshiron dhe jo të na kthejë në vitin 2013”, ka shtuar ai.
Profesori i të drejtës ka thënë se formimi i Asociacionit është e vetmja pikë që s’është realizuar deri tash nga pakoja e Ahtisaarit.
Hyseni ka pranuar se Asociacioni është sfidë e rëndë për çdo qeveri, por sipas tij, kjo nuk është një temë e fushatave politike për shkak se është një agjendë shtetërore e jo politikë ditore.
Por duke parë këmbënguljen e ndërkombëtarëve për formimin e tij dhe kundërshtimin e Qeverisë së Kosovës, Hyseni ka thënë se do të jetë shumë e vështirë për ekzekutivin e drejtuar nga Albin Kurti që të qëndrojë në pushtet deri në fund të mandanit.
Hyseni nuk pret një marrëveshje finale në muajt në vijim.
