Drejtori i Institutit EPIK, Demush Shasha, i ka quajtur sensacione momentale politike gjashtë kushtet e kryeministrit Albin Kurti për Asociacionin, duke thënë se ato duhej të ishin produkte të një procesi serioz politik “që synon t’i kthejë parimet në politikë shtetërore”.
Sipas Shashës, nëse Kurti beson në “vijat e kuqe” të Asociacionit, duhej të mbante takime me liderët e opozitës dhe të niste një dialog konfidencial.
“Kësisoj këto do kishin marrë formën përfundimtare të një platforme për dialogun të cilën do mbështetnin të gjitha partitë. Kështu si ka vepruar kryeministri duke i hedhur këto 6 kushte nga qielli në cirkun politik, ai vetëm ka thelluar përçarjet në mes partive rreth kësaj çështje”, ka deklaruar drejtori i EPIK-ut.
Ai u shpreh se mënyra si u prezantuan kushtet, duken “jashtëzakonisht” të ngjashme me kushtet e dialogut, CEFTA në SEFTA, nënshkrimi i marrëveshjes së paqes dhe mosagresionit, reciprocitetet bilateral në çështje të pakicave dhe largimi i Odaloviqit nga delegacioni serb.
“Nëse mbani mend edhe këto u patën prezantuar me një dozë improvizimi dhe sensacioni. Rrjedhimisht sot ngritët brenga që këto 6 kushte për asociacionin do e ndajnë fatin e njëjtë me ato 4 kushte të dialogut të cilat tani i takojnë historisë”, ka shtuar ai.
Të enjten në seancën e Kuvendit, kryeministri Kurti prezantoi gjashtë kushte nën të cilat u shpreh se do të pranonte formimin e Asociacionit. Kushtet që përmendi ishin që Asociacioni të jetë në përputhje me Kushtetutën, të ndërrojë emrin, të mos jetë monoetnik, të mos ketë kompetenca ekzekutive, të drejtat e pakicave të kenë parimin e reciprocitetit, të shuhen strukturat ilegale të Serbisë, që Asociacioni të jetë pjesë e marrëveshjes finale e të zbatohet pas njohjes e që Serbia t’i tërheqë letrat dërguar shteteve mosnjohëse në BE për të kundërshtuar aplikimin e Kosovës për anëtarësim në Bashkimin Evropian.
© KOHA. Të gjitha të drejtat janë të rezervuara.
