Sipas Bislimit, më i rëndësishëm është ndryshimi i qëndrimit të Kurtit për Asociacionit, pasi për gjashtë kushtet shprehet se janë vetëm fjalë.
“Nuk duhet të ndalemi te formulimi i kushteve, pasi Kurti e ka bërë të zakonshme të formulojë kushte me fjalë nëpër mediat tona dhe Kuvend. Duhet të ndalemi te qëndrimi, që ka ndryshuar skajshmërisht. Ato kushte janë vetëm për efekte mediatike. Është tjetër plasimi i kushteve në tavolinën e negociatave, dhe tjetër vetëm formulimi”, ka thënë ai në “60 Minuta” të KTV-së.
Për t’i plasuar kushtet në tavolinën e negociatave, siç ka deklaruar Bislimi, duhet që puna të bëhet shumë më herët dhe të jesh aktiv në diplomaci. Ka shtuar se nuk duhet futur SHBA-ja në lojëra mediatike, ashtu siç sipas tij, po bën Kurti.
“Bën formulime para popullit, por nuk ka plasuar kushtet në tavolinën e negociatave. Nuk luhet kështu me SHBA-në, nuk duhet bërë lojëra mediatike me SHBA-në. E ka bërë diplomacinë poçavër. Diplomacia është politikë e lartë, nuk është politikë popullore”, ka thënë Bislimi.
Anëtari i AAK-së tutje ka thënë se është pikërisht Qeveria e Kurtit që e ka vënë në qendër të dialogut formimin e Asociacionit, me tensionet për çështjen e targave dhe zgjedhjeve në veri.
“AAK-ja ka qenë e qartë, i kemi thënë Kurtit që të mos merret me çështjen e targave apo zgjedhjeve që shkaktuar tensione për të arritur në ditën e sotme. E ka favorizuar Serbinë në këtë rrafsh. E ka vënë në qendër të dialogut ‘Zajednicën’ apo siç ia kanë ndërruar emrin prej që kanë ardhur në pushtet e po i thojnë Asociacion. Në raport forcash me të cilat na ka vënë Kurti, gjendemi para aktit të kryer, por duhet të bëjmë diçka. Nuk po them se duhet të formohet, ajo i takon Kurtit të vendosë, por po them se duhet bërë diçka”, ka shtuar Bislimi.
Ai ka thënë se është e pamundur që SHBA-ja të kërkojë opozitën si partnere alternative për formimin e Asociacionit, pasi ka thënë se Qeveria ka fituar 51 për qind të votave dhe ka shumicën.
Të enjten në seancën e Kuvendit, kryeministri Kurti prezantoi gjashtë kushte nën të cilat u shpreh se do të pranonte formimin e Asociacionit. Kushtet që përmendi ishin që Asociacioni të jetë në përputhje me Kushtetutën, të ndërrojë emrin, të mos jetë monoetnik, të mos ketë kompetenca ekzekutive, të drejtat e pakicave të kenë parimin e reciprocitetit, të shuhen strukturat ilegale të Serbisë, që Asociacioni të jetë pjesë e marrëveshjes finale e të zbatohet pas njohjes e që Serbia t’i tërheqë letrat dërguar shteteve mosnjohëse në BE për të kundërshtuar aplikimin e Kosovës për anëtarësim në Bashkimin Evropian.
