Gjocaj: Çmimi i rrymës në bursat ndërkombëtare s’është i lartë, s’ka arsye për rritje
Liron Gjocaj nga Instituti “INDEP” ka thënë se në kushtet aktuale, rritja e çmimit të energjisë elektrike nuk duhet të ndodhë në Kosovë.
Gjocaj ka thënë të mërkurën në “60 Minuta” të KTV-së, se çmimi i energjisë elektrike në bursat ndërkombëtare aktualisht nuk është i lartë, për çka sipas tij, nuk ka arsye që KEDS-i apo KESCO-ja të kërkojë në Zyrën e Rregullatori të Energjisë (ZRRE) ngritjen e tarifave.
“Këtë vit kemi zvogëlim të çmimit të energjisë në bursat ndërkombëtare. Në bursën hungareze sot gjatë ditës, në kohën e pikut, çmimi i energjisë ka variuar nga 170 – 180 euro për megavat orë. Vitin e kaluar ka pasur periudha që çmimi ka qenë deri në 700 euro për megavat orë. Vitin e kaluar kemi pasur edhe motin e përkeqësuar. Momentalisht në këto rrethana, ani pse nuk jemi të njoftuar në detaje, nuk jemi të mendimit që duhet të kemi ngritje të çmimit të energjisë, pasi është një barrë ekstra për çdo konsumator”, ka thënë Gjocaj.
Ai ka thënë se si INDEP nuk e shohin të arsyeshme të shtrenjtohet energjia elektrike, nëse merret për bazë çmimi i importit të këtij produkti.
Pavarësisht kësaj, ai ka thënë se çmimi i energjisë elektrike ka pasur ngritjen më të vogël në krahasim me produktet e tjera dhe inflacionin në Kosovë.
“Nuk besoj që të ketë rritje deri në 200%. Momentalisht besoj që edhe nëse do të ketë ngritje, nuk do të ketë në atë masë”, ka shtuar Gjocaj.
Zyrtarët e ZRRE-së kanë bërë të ditur të martën gjatë raportimit në Kuvend se janë duke i shqyrtuar tarifat e energjisë elektrike. Kryetari i Bordit të ZRRE-së, Ymer Fejzullahu, në Komisionin parlamentar për ekonomi, ka theksuar se në dhjetor të vitit të kaluar kanë filluar shqyrtimin jashtëzakonshme të tarifave të energjisë elektrike.
