MF-ja paditet për refuzim të kompensimit për një person të kategorisë paraplegjikë dhe tetraplegjikë
Përfaqësues të GLPS-së dhe një qytetare kanë deponuar padi ndaj Ministrisë së Financave për refuzimin e kompensimit për një person që i përket kategorisë së personave paraplegjikë dhe tetraplegjikë. Në justifikimin e padisë theksohet se Ministria ia mohoi qytetares të drejtën për një asistent, pasi gjatë rivlerësimit e kategorizoi atë nga grupi i parë në atë të dytin. E këtë vendim, në GLPS e kualifikuan si të kundërligjshëm
Padi ndaj Ministrisë së Financave shkaku i refuzimit të kompensimit të paraparë ligjor për një person paraplegjik dhe tetraplegjik, deponuan të mërkurën në Gjykatën Themelore në Prishtinë, përfaqësues të organizatës GLPS dhe një qytetare.
Padia është dorëzuar me justifikimin se kjo Ministri bëri shkelje ligjore, kur gjatë rivlerësimit kategorizues që bëhet çdo pesë vjet, një qytetares që i përket kësaj kategorie ia mohoi të drejtën për shoqërues, duke e vendosur nga grupi i parë në atë të dytin.
Donika Çeta, eksperte ligjore në GLPS, teksa e dorëzoi padinë bashkë me nënën e të dëmtuarës, tha se vendimi i dalë nga rivlerësimi bie ndesh me ligjin.
“Vendimin, të cilin sot e kemi atakuar, është nxjerrë në kundërshtim me ligjin për statusin e personave paraplegjikë dhe tetraplegjikë, për arsye se i është mohuar e drejta për një kujdestar personal me qëllim të ofrimit të kujdesit dhe shërbimeve të domosdoshme ditore”, ka thënë Çeta.
Fahrije Dema, nëna e së dëmtuarës, shprehu vërejtjen se vajza e saj është caktuar në grupin e dytë, pa iu bërë kontrollimi adekuat.
“Prej 2017 deri në 2022 me vendim të Spitalit të Neurologjisë ka qenë në grupin e parë edhe Ministria e Mirëqenies Sociale e pati miratuar atëherë. Mirëpo, në vitin 2022, Spitali prapë e ka miratuar, por komisioni i dytë jo. Aty pa kurrfarë arsye na kanë refuzuar. Nuk ka pasur as kontroll, as kurrfarë pyetje. Nuk na kanë lejuar të flasim edhe kur e kam marrë vendimi kam parë që kërkesa është refuzuar pa kurrfarë arsyetimi”, ka thënë Dema.
Afrim Maliqi, drejtor në organizatën “HANDIKOS”, tha se ka pranuar vërejtje rreth kategorizimit nga 40 persona, teksa thotë që numri i tyre mund të jetë shumë më i madh.
“Ne kemi informata për diku rreth 40 paraplegjikë dhe tetraplegjikë që për shkak të mosvlerësimit të drejtë nga komisionet vlerësuese mjekësore nga Ministria e Financave, Punës dhe Transfereve janë larguar nga grupi i parë në grupin e dytë. Po ashtu kemi informata nga Departamenti i Pensioneve që në vitin 2019 kanë qenë të përfshirë 3100 paraplegjikë dhe tetraplegjikë, ndërsa tani janë 2470 veta! E që numri i atyre që janë larguar nga grupi 1 në grupin 2 sigurisht është më i madh”, ka thënë Maliqi.
Ligji për statusin dhe të drejtat e personave paraplegjikë dhe tetraplegjikë parasheh kompensim mujor prej 375 eurosh dhe një asistent personal për ata që kategorizohen në grupin e parë, përderisa për ata në grupin e dytë përfshihet asistenca mujore prej 150 eurosh.
