Imeri s’pret të nënshkruhet ndonjë marrëveshje në Ohër
Profesori i shkencave politike në Universitetin e Prishtinës, Dorajet Imeri, është shprehur tejet skeptik se në të ardhmen e afërt do të nënshkruhet ndonjë marrëveshje për normalizim të marrëdhënieve mes Kosovës dhe Serbisë, përfshirë edhe në takimin në Ohër më 18 mars.
Imeri ka thënë se Bashkimi Evropian e ka ndjerë se ende nuk i ka palët në të njëjtën linjë që dëshiron. Ka shtuar se në takimin e fundit Bruksel më 27 shkurt, është arritur maksimumi i asaj që mund të arrihej.
“BE-ja duket se vazhdon të mos i ketë palët në linjën që dëshiron. Maksimumi në atë takim ka qenë që palët të dakordohen për të arritur marrëveshje. Në Serbi, Plani evropian ka pas kundërshtime të mëdha – është strategji e tyre që të mund të fitojnë në planin e veprimit. Pritshmëritë për të nënshkruar marrëveshjen në Ohër janë tepër të ulëta, për shkak të dinamikave të procesit”, ka thënë ai në “60 Minuta” të KTV-së.
Imeri ka theksuar se Kosova duhet të tregojë zgjuarsi në këto momente që t’i qaset sa më pozitivisht planit të veprimit të Planit evropian.
Profesori i shkencave politika ka thënë se marrëveshja e propozuar në Bruksel ishte edhe produkt i gjendjes së tensionuar në veri vitin e kaluar. Ka potencuar se Serbia nuk është e gatshme të bëjë paqe me Kosovën.
Për çështjen e Asociacionit, Imeri ka thënë se Kosova duhet të tregohet kreative në gjetjen e alternativave.
