Hetim preliminar në Kardiologji, dyshime për administrimin e listës së pritjeve
Foto: Driton Paçarada / KOHA
Hetues të Krimeve Ekonomike javën e shkuar kërkuan nga Klinika e Kardiologjisë në QKUK disa shkresa lidhur me 4 pacientë të trajtuar aty. Asnjëra nga instancat nuk e konfirmoi zyrtarisht rastin, por burime të KOHËS bënë të ditur se hetimi ka filluar pasi një nga mjekët e kësaj klinike i është drejtuar hetuesisë, me kërkesë për inicimin e hetimit ndaj kolegëve
Policia e Kosovës është kthyer sërish për hetim në Klinikën e Kardiologjisë në QKUK. Javën e shkuar, hetues të Policisë së Krimeve Ekonomike patën kërkuar informata mbi mënyrën e funksionimit të kësaj klinike.
Një burim i ka thënë KOHËS se hetimi, krahas tjerash, ka të bëjë me mënyrën se si administrohen listat e pritjes përbrenda klinikës. Lista të pritjes aty ka kryesisht për procedurat e koronarografisë, stentimeve dhe vendosjes së pacemakerëve.
Lidhur me hetimin, KOHA ka kontaktuar menaxhmentin e SHSKUK-së nëpërmjet emailit, porse nuk ka marrë përgjigje. E në një bisedë telefonike, drejtori i Kardiologjisë, Lulzim Kamberi, ka thënë se as ai e as ndonjë punëtor nuk është njoftuar mbi një hetim të tillë.
Policia e Krimeve Ekonomike, përmes një përgjigjeje me shkrim, kanë thënë që nuk ka në procedurë ndonjë hetim të tillë. Megjithatë, KOHA është informuar që tashmë, ky hetim është në procedurë dhe është iniciuar, pasi një mjek i QKUK-së ka paraqitur rastin. Identitetin e këtij mjeku e di KOHA.
I kontaktuar nga KOHA, ky kardiolog ka thënë se “nuk di gjë”, por sugjeroi që informatat të merren në hetuesi.
Burime të ndryshme përbrenda QKUK-së kanë thënë se e kanë parë shkresën e Njësisë së Krimeve Ekonomike. Një nga ta i ka thënë KOHËS që në këtë shkresë, policia ka kërkuar dosjet e katër pacientëve nëse atyre u janë bërë koronarografia apo u janë vendosur pacemakerë, si dhe se çfarë metodash janë aplikuar.
KOHA muaj me parë pati raportuar që në listat e pritjes për këto shërbime janë pacientë që janë paraqitur në QKUK qysh nga viti 2021. Listat e pritjes për stentime në këtë klinikë ishte eliminuar në vitin 2018, porse ishin krijuar sërish shkaku i situatës me pandeminë COVID-19.
Kardiologjia është një prej klinikave me të diskutuara të QKUK-së.
Pjesa më e madhe e mjekëve që punojnë aty aktualisht janë duke u përballur me akuza për korrupsion, në kuadër të rastit të njohur si “Stenta 2”. Akuzat e Prokurorisë së Shtetit ndërlidhen kryesisht me rekrutimin e pacientëve për spitalet private, nëpërmjet ryshfetit. Gjykimi për rastin nuk është përmbyllur qe rreth 7 vjet.
