Pas funksionalizimit të Komerciales përkeqësohet situata me lëndët e pazgjidhura
Gjykata Komerciale është funksionalizuar shtatë muaj më parë nga Qeveria, me qëllim që t’u japë zgjidhje më të shpejtë kontesteve tregtare dhe konflikteve administrative të bizneseve. Por, prej atëherë, situata me lëndët e pazgjidhura është përkeqësuar. Në Këshillin Gjyqësor fajin për këtë e hodhën në Ministrinë e Financave
Ka katër vjet që gjykatat nuk i kanë dhënë epilog një procesi gjyqësor që lidhet me biznesin e drejtuar nga Petrit Babaj nga Skenderaj.
Babaj thotë se ka një vit e gjysmë prej kur është mbajtur seanca e fundit për rastin.
“Prej 2019-s deri më sot janë mbajtur 3 seanca. Tri seanca të tjera janë të anuluara – dy janë për shkak që paneli i gjyqtarëve nuk e ka njoftuar palën paditëse, e një seancë na ka dështuar që ne kemi shkuar në mënyrë të rregullt, por kur kemi shkuar aty gjyqtari ka thënë që jemi në grevë dhe nuk na ka pranuar brenda”, ka thënë Babaj për KOHËN.
Pushteti aktual pati dhënë zotimin se nëpërmjet themelimit të Gjykatës Komerciale kontestet tregtare dhe konfliktet administrative të bizneseve do të zgjidhen shpejt. Gjykata është funksionalizuar prej shtatë muajsh, por rezultatet nuk janë parë.
Avokati Urim Vokshi tregon për përkeqësim të situatës prejse është funksionalizuar Gjykata. Ai thotë se nuk është treguar efikasitet, meqë lëndët kanë shkuar duke u rritur.
“Sipas raportit të punës së Gjykatës Komerciale për periudhën gusht-dhjetor, për periudhë pesëmujore rrjedh që Gjykata Komerciale ka pranuar 442 lëndë më shumë në shkallë të parë sesa që ka arritur t’i zgjidhë. Kjo nënkupton që numri i lëndëve të pazgjidhura është duke u rritur ende më tepër se që ka qenë para se të fillojë punën Gjykata Komerciale”, ka thënë Vokshi.
Ligji parasheh së paku 20 gjyqtarë që duhet të jenë në shkallën e parë dhe të dytë në Komerciale, por Gjykata i ka 15 gjithsej.
Për mostrajtimin e lëndëve me kohë, avokati Vokshi thotë se shkak është bërë edhe numri i vogël i gjyqtarëve.
“Para themelimit të Gjykatës Komerciale kanë qenë diku 22 gjyqtarë të cilët kanë punuar në shkallë të parë dhe shkallë të dytë”, rikujton ai.
E në Gjykatën Komerciale treguan se janë në pritje të shtimit të numrit të gjyqtarëve. Në një përgjigje të shkruar theksohet se Gjykata është në pritje të Këshillit Gjyqësor (KGJK) që pozitat të plotësohen gjatë këtij viti.
“Aktualisht jemi në pritje të plotësimit edhe të tri pozitave të gjyqtarëve të Dhomave të Shkallës së Parë, ndërsa presim që KGJK-ja gjatë këtij viti të bëjë përpjekje që të hapë konkursin për plotësimin e të gjitha vendeve të lira për gjyqtarë, ashtu siç përcaktohet edhe me organogramin e Gjykatës”, është thënë në përgjigjen e Komerciales.
Por në këtë KGJK kanë thënë t’i kenë ndërmarrë të gjitha veprimet, ndërsa përgjegjësinë për mosplotësimin e pozitave e hodhën tek Ministria e Financave.
“Këshilli Gjyqësor i Kosovës (KGJK) ka ndërmarrë të gjitha veprimet për t’i plotësuar pozitat në Gjykatën Komerciale, kështu që, lidhur me mosplotësimin e të gjitha pozitave, ju lutem të drejtoheni tek Ministria e Financave”, thuhet në një përgjigje të shkruar të KGJK-së.
Por në Ministri nuk i kanë ofruar përgjigje KOHËS në pyetjet mbi këtë pretendim të Këshillit Gjyqësor.
Përderisa është kjo situatë, biznesmeni Babaj thotë se zvarritja e procesit gjyqësor në rastin e biznesit të tij e ka dëmtuar shumë financiarisht.
“100 mijë euro është dëmi që më është bërë në biznes, por 10 herë më shumë është dëmi që po ma bën Gjykata, pritja e saj në këtë rast në biznesin tim”, është ankuar ai.
Kur Gjykata Komerciale u funksionalizua, nga gjykatat e tjera asaj iu transferuan 6754 lëndë që ndodheshin në shqyrtim në shkallë të parë. Shtatë muaj pas, numri i tyre është rritur në 8191.
