ZPS-ja i akuzon për vrasjen e kundërshtarëve politikë, ish-drejtuesit e UÇK-së deklarohen të pafajshëm
Foto: AP
Të hënën ka nisur shqyrtimi kryesor pranë Dhomave të Specializuara në Hagë, në procesin gjyqësor në të cilin ish-drejtuesit e UÇK-së: Hashim Thaçi, Kadri Veseli, Rexhep Selimi dhe Jakup Krasniqi akuzohen për krime lufte dhe krime kundër njerëzimit. Në fjalët hyrëse të Zyrës së Prokurorit të Specializuar është thënë se viktimat ishin të komuniteteve të ndryshme, porse shumica shqiptarë që konsideroheshin tradhtarë e kundërshtarë politikë. Të katër të akuzuarit , që për dy vjet e gjysmë mbahen në paraburgim, u deklaruan të pafajshëm
Ish-udhëheqësit e Ushtrisë Çlirimtare të Kosovës janë deklaruar të pafajshëm, të hënën, në seancën e parë të shqyrtimit kryesor të rastit, ku nga Zyra e Prokurorit të Specializuar në Hagë ata akuzohen për krime lufte e krime kundër njerëzimit.
Hashim Thaçi, Kadri Veseli, Rexhep Selimi e Jakup Krasniqi - në luftë anëtarë të Shtabit të Përgjithshëm të UÇK-së, e pas saj ushtrues të disa funksioneve shtetërore - para trupit gjykues i kanë konfirmuan deklaratat e dhëna më herët kur kanë thënë se nuk janë përgjegjës për asnjë nga pikat e aktakuzës.
“E kuptoj, jam plotësisht i pafajshëm”, ka thënë ish-presidenti Hashim Thaçi.
E ish-kryetari i Kuvendit, Kadri Veseli, ka shprehur ankesë për gjykimin e gjatë.
“E shpreh pakënaqësinë time për një vonesë të tillë dyvjeçare e gjysmë, megjithatë ju falënderoj. Tërësisht i pafajshëm”, ka thënë Veseli.
Ngjashëm është deklaruar edhe Rexhep Selimi, ish-shef i Grupit parlamentar të LVV-së.
“E konfirmoj edhe një herë që jam i pafajshëm në të gjitha pikat e aktakuzës”, ka thënë Selimi.
Po ashtu, akuzat e Prokurorisë i ka mohuar ish-kryetari i Kuvendit, Jakup Krasniqi.
“Unë nuk kam asnjë lidhje me asnjërën prej pikave që i lexoi prokurorja para pak kohe. Aktakuzën e kuptoj kështu siç është, por nuk pajtohem me të, pasi nuk mbaj asnjë përgjegjësi për të cilën flet aktakuza”, ka thënë Krasniqi.
Të katër ish-eprorët e UÇK-së akuzohen për ndërmarrje të përbashkët kriminale.
Prokurorët e ZPS-së pretendojnë se janë rreth 1000 dëshmitarë për krimet, që, sipas tyre, i kanë kryer të akuzuarit. Numri i atyre që pritet të dëshmojnë në cilësi të viktimave është 140. Sipas ushtruesit të detyrës së kryeprokurorit të ZPS-së, Alex Whiting, shumica e viktimave ishin shqiptarë, e që shiheshin nga të akuzuarit si tradhtarë e kundërshtarë politikë.
“Provat do të tregojnë se katër të akuzuarit në rolet e tyre si udhëheqës të lartë të Shtabit të Përgjithshëm mbështetën dhe zbatuan një politikë e cila i vendoste në shënjestër ata persona të cilët konsideroheshin prej tyre si kundërshtarë, përfshirë ata që akuzoheshin si kolaboracionistë, shpesh mbështetur në asgjë, pos lidhjeve me institucionet serbe, si dhe personat e perceptuar si jombështetës të qëllimeve apo mjeteve të UÇK-së dhe më vonë të Qeverisë së Përkohshme të Kosovës”, ka thënë Whiting.
Ai përmendi mbi 100 vrasje të kryera nga të akuzuarit, ku, sipas tij, dominojnë “kundërshtarët politikë”.
“Ata të cilët perceptoheshin si kundërshtarë të tillë përfshinin persona të lidhur me Lidhjen Demokratike të Kosovës, LDK, si dhe persona me përkatësi etnike serbe apo rome… Aktakuza përfshin dhe ne synojmë të vërtetojmë qindra burgosje në mbarë Kosovën, zakonisht në kushte të tmerrshme keqtrajtimi dhe mbi 100 vrasje, shumica e viktimave të të akuzuarve ishin shqiptarë të Kosovës”, ka thënë Ëhiting.
Sipas Prokurorisë, disa prej dokumenteve janë konfiskuar nga shtëpia e Jakup Krasniqit dhe ajo e Rexhep Selimit. Si dëshmi, prokurorët kanë paraqitur video-materiale, dokumente, si komunikatat e UÇK-së, procesverbalet e takimeve dhe vendimet e Këshillit të Përgjithshëm të UÇK-së. Përgjegjës sipas prokurorit Mat Halling për krimet e pretenduara i bën drejtuesit e Shtabit të Përgjithshëm.
“Për pjesën më të madhe të periudhës së aktakuzës Shtabi i Përgjithshëm ishte i vendosur këtu në malet e Berishës në afërsi të Kleçkës, në një vend të quajtur Divjakë. Shtabi i Përgjithshëm ishte për një periudhë të shkurtër të aktakuzës në Likovc, ata u vendosën përkohësisht për një periudhë kohore dhe iu desh të shkonin në Novosellë. Pjesëtarët e Shtabit të UÇK-së kanë udhëtuar në masë të madhe në shtabet e UÇK-së në të gjithë Kosovën dhe në zona të tjera, megjithatë kjo zonë është vendi ku ka qëndruar kryesisht Shtabi i Përgjithshëm”, tha Halling.
E mbrojtësi i viktimave, Simon Laws, ka thënë se në mesin e viktimave ka edhe ish-pjesëtarë të UÇK-së. Ai, po ashtu, ka theksuar se nuk po gjykohet ushtria, por individët.
“Së pari, më lejoni të them këtë: ndërmjet viktimave në këtë çështje ka një mori sjelljesh e qëndrimesh të tyre në raport me UÇK-në. Kemi viktimat të cilat kanë qenë pjesëtarë të UÇK-së ose që dëshironin të bëheshin anëtarë të saj, të kyçeshin në të apo që kanë dhënë mbështetjen e tyre për të dhe ka viktima të cilat ishin dhe mbeten sot e kësaj dite kundër saj... Kur flasim për krimet e bëra kundër viktimave duhet gjithmonë të kuptohemi që u referohemi krimeve të kryera nga pjesëtarë të caktuar të UÇK-së dhe nuk duhet të kuptohet si akuzim i organizatës, i UÇK-së në vetvete”, ka thënë Laws.
Në anekset me listën e viktimave në të përfshihen mbi 400 viktima të mbajtjes në qendrat e ndalimit, mbi 100 vrasje dhe 20 të zhdukur me dhunë.
Sipas aktakuzës së publikuar në shkurt të këtij viti, Thaçi, Veseli, Krasniqi e Selimi e kanë ditur ose kanë pasur arsye të dinin për krimet që ndodhnin nëpër vende të ndryshme të Kosovës e Shqipërisë, përfshirë vrasje, torturë e trajtim mizor në periudhën 1998-99. Ata akuzohen se kanë marrë pjesë personalisht në frikësim, marrje në pyetje, keqtrajtim të të ndaluarve.
Seanca e radhës mbahet të martën, kur është e planifikuar fjala hyrëse e mbrojtjes së të akuzuarve.
