Kosova ka eksportuar në Gjermani 9.8 për qind të të gjithë eksportit të vendit në muajt e parë të vitit 2023, ndërsa importi ka shënuar një vlerë shumë të madhe, sipas të dhënave të publikuara nga Oda Ekonomike Gjermano-Kosovare.
Oda Ekonomike Gjermano-Kosovare të shtunën ka publikuar të dhënat e përpunuara prej raporteve të Bankës Qendrore të Kosovës dhe Doganës së Kosovës për tremujorin e parë të vitit 2023, në raportin e tregtisë së jashtme me Gjermaninë.
Eksporti, sipas njoftimit të Odës Ekonomike Gjermano-Kosovare, në periudhën janar-mars 2023 ka arritur vlerën e rreth 21 milionë eurove, që ka pjesëmarrje prej 9.8% në eksportin e përgjithshëm të Kosovës.
“Produktet më të eksportuara nga Kosova drejt Gjermanisë kanë qenë: dyer dhe dritare, materiale ndërtimi prej plastikës dhe kasaforta të blinduara apo të përforcuara”, thuhet në njoftim.
Në anën tjetër, sipas njoftimit, është vërejtur një vlerë shumë më e madhe e importit nga Gjermania, në lartësinë e rreth 152 milionë eurove, që përbën 7.8% të gjithë importit në vend.
“Produktet më të eksportuara nga Gjermania në drejtim të Kosovës kanë qenë veturat. Më pas vijnë shufrat, shkopinjtë apo profilet prej polimereve të vinil kloridit dhe në fund vijnë cigaret që përmbajnë duhan”, thuhet në njoftim.
https://www.facebook.com/OEGJK/posts/pfbid0PLusin1y6fwdnnDMvdudUoEKzcQUVXKMDFDTohbdMxScsVJjPaG4Kd6BgEWq5K7Fl
© KOHA. Të gjitha të drejtat janë të rezervuara.
