Sadri Rrmoku nga Instituti Kosovar për Qeverisje Lokale vlerëson se do të jetë sfiduese marrja e mandateve nga kryetarët e dalë nga zgjedhjet e të dielës në komunat veriore të Kosovës.
Të dielën janë mbajtur zgjedhje të jashtëzakonshme në Mitrovicë të Veriut, Leposaviq, Zubin-Potok dhe Zveçan, ndërsa dalja ishte mjaft e ulët.
Rrmoku në emisionin “60 Minuta” në KTV, ka thënë se ishte e pritur që numri i votuesve të ishte i ulët pas bojkotimit të zgjedhjeve nga Lista Serbe dhe thirrjeve bërë qytetarëve për t’i bojkotuar zgjedhjet.
Rrmoku thotë se nuk ka një numër të saktë të popullsisë në ato zona, kështu që përqindja mund të jetë më ndryshe, porse thotë se asnjëherë që nga paslufta nuk ka pasur më pak votues në zgjedhje.
Por, Rrmoku thotë se bazuar në ligjet e Kosovës zgjedhjet janë legjitime, pasi që në asnjë ligj të Kosovës nuk caktohet kufiri se sa përqind e votuesve duhet të marrin pjesë që zgjedhjet të konsiderohen legjitime.
Rrmoku ka thënë sfiduese do të jetë marrja e mandateve për kryetarët e komunave e po ashtu të mandateve në asambletë komunale.
“Deri 30 ditë pas certifikimit të rezultateve nga KQZ-ja, kryetari i zgjedhur, duhet të japë betimin para Kuvendit Komunal. Te çështja e kuorumit nuk përcaktohet cili duhet të jetë. Por, duhet të merret parasysh neni që rregullon kuorumin në seanca të rregullta të kuvendeve komunale, pra shumica e thjeshtë. Në momentin që kryetari e ka shumicën e thjeshtë në seancë solemne të betimit, atëherë ai e merr mandatin e fillon punën. Por, në rast se nuk e ka, atëherë pas 30 ditëve në procedura të rregullta vendi shkon sërish në zgjedhje”, ka thënë Rrmoku.
Ai ka treguar edhe raste tjera ku një kuvend komunal konsiderohet jofunksional.
“Kur nuk zgjedhet kryesuesi i Kuvendit në afatin ligjor prej 30 ditëve nga mbatja e seancës konstituive, nëse Kuvendin nuk arrin me miratu buxhetin vjetor, nëse nuk kalon statuti i komunës apo në rast se kuvendi komunal nuk mban seanca të rregullta për 6 muaj”, tha Rrmoku, që ka shtuar se sfiduese do të jetë edhe nëse administrata komunale vendos me bojkotu kryetarin e ri.
Rrmoku ndërkohë ka thënë se zgjedhjet e së dielës kanë treguar për problematikat që janë në veri.
Ai thotë se nuk beson se rezultati i këtyre zgjedhjeve do të ketë ndikim në zgjedhjet e përgjithshme në të ardhmen.
“Përveç mesazheve politike që ka mundur të japë ky proces, ndikimi elektoral nuk mund të jetë aq i madh në ndryshimin e rezultateve në zgjedhje qendrore, kurdo që mbahen ato”, tha Rrmoku.
© KOHA. Të gjitha të drejtat janë të rezervuara.
