2 perditesime
17:38

Pjesa më e madhe e dëshmisë së dëshmitarit 5 mbahet në seancë të mbyllur

Pranë Dhomave të Specializuara në Hagë në pjesën e pasdites së seancës së sotme (e mërkurë) ka nisur dëgjimi i dëshmitarit të pestë në gjykimin ndaj ish-krerëve të Ushtrisë Çlirimtare të Kosovës (UÇK).

Ashtu si katër dëshmitarët e dëgjuar në këtë rast, edhe ky i pesti filloi të jap dëshminë e tij në seancë të mbyllur.

Kryesuesi i trupit gjykues, Charles L. Smith u shpreh se kjo po bëhet për të mbrojtur të dhënat personale të dëshmitarit.

Dhënia e dëshmitarit të mbrojtur 3165, pritet të zgjas dy ditë, dhe është planifikuar që fillimisht për dy orë të parashtrohen pyetje nga Zyra e Prokurorit të Specializuar, për të vazhduar me 7 orë të tjera me kundra pyetje nga mbrojtja e të akuzuarve.

“Sot do të fillojmë me dëshminë tuaj që mendohet se do të zgjas dy ditë. Sikurse e dini fillimisht do iu bëjë pyetje prokuroria, kur të përfundojnë ata kanë palët mbrojtëse t’iu bëjnë pyetje si dhe anëtarët e trupit gjykues mund tu bëjnë ju. Prokuroria parashikon 2 orë tu bëjë pyetje, mbrojtja parashikon 7 orë... Prokurorja do të fillojë me pyetjet e saj, por për këtë duhet të kalojmë në seancë private në mënyrë që të mbrojmë të dhënat tuaja personale”, u shpreh Smith.

Ndërsa, pas më pak se 1 orë që dëshminë e tij e dha në seancë të mbyllur, seanca u hap për publikun dhe prokurorja e ZPS-së bënte pyetje rreth një rasti për të cilin dëshmitari kishte folur.

Prokurorja: Na the se pe disa burra me armë zjarri, sa afër ishte kur i pe, nga sa afër i pe

Dëshmitari: Diku prej 3-4 metra

Prokurorja: 3-4 metra ishte kur i pe për herë të parë këta burrat

Dëshmitari: për herë të fundit kur i kam parë isha kur jam takuar me ta diku 3-4 metra jam takuar

Prokurorja: Sa larg ishte kur i pe për herë të parë

Dëshmitari: mbi 150 metra-200

Prokurorja: Dhe ti qëndrove në vend apo shkove në drejtim të tyre

Dëshmitari: Më trup për me iu dal përpara për ta ndal rastin

Prokurorja: The që shkove nga një rrugë tjetër

Dëshmitari: Shkova nga rruga tjetër se ata që ishin në makinë ishin një rrugë ma trup për me i dal përpara makinës isha më afër, se ku ishin hyp dhe ku u dufke me dal përpara

Prokurorja :Pse doje që të dilje përpara t’i shifje

Dëshmitari: T’i shihja sepse i dëgjova krismat dhe i pash që i kishin marr të afërmit e mijë në një makinë

Më pas prokurorja vazhdoi me pyetja karshi dëshmitarit të pestë duke e pyetur se njerëzit që i kishte parë për rastin që fliste çka kishin të veshur.

Në përgjigjen e tij ky dëshmitar tha se personat kishin të veshur uniforma të zeza me emblema të UÇK-së të cilat vendoseshin në krahë.

Prokurorja: Të përqendrohemi tek veshjet e këtyre njerëzve, çka kishin veshur këta njerëz

Dëshmitari: Po, këta kanë pasur uniforma të zeza të veshura me emblema të Ushtrisë Çlirimtare të Kosovës dhe me maska në fytyrë

Prokurorja: Kur thoni me emblema të UÇK-së, a mund të na e përshkruani çfarë patë tek kjo emblema

Dëshmitari: Shkruan Ushtria Çlirimtare e Kosovës dhe UÇK është në krejt është emblema që i kemi mbajtur ne ushtria që kemi qenë të veshur

Prokurorja: Dhe kjo ishte emblema që pe tek burrat që ishin veshur me të zeza që morën të afërmit tuaj...Ju përmendet dhe ju thatë ne kishim ato emblema për kë e ke fjalën kur the ne?

Prokurorja: Në ç’vend të rrobave vendosjes kjo emblemë, ku mbaheshin

Dëshmitari: Në krahë

Në këtë seancë gjykimi trupi gjykues lëshoi urdhër gojor duke kërkuar parashtrime nga palët, deri më 31 maj, të gjenden zgjidhje për të siguruar që këto seancat të jenë publike në shkallë më të lartë.

Ndërsa, gjatë kësaj seance të sotme e ka përfunduar dhënien e dëshmisë së tij dëshmitari i katërt. Ai sot iu përgjigj pyetjeve të mbrojtjes së Selimit dhe Krasniqit. Ndërsa, dëshminë e tij ka filluar ta jap nga 10 maji.

Gjykimi ndaj ish-krerëve të UÇK-së ka nisur më 3 prill me deklaratat hyrëse të palëve.

Para trupit gjykues, Thaçi, Veseli, Selimi dhe Krasniqi janë deklaruar të pafajshëm për akuzat për krime të pretenduara të luftës.

Ata ndodhen në qendrën e paraburgimit në Hagës prej nëntorit të vitit 2020. /KSP

13:48

Fillon dëshminë dëshmitari i pestë në gjykimin ndaj Thaçit dhe të tjerëve

Pranë Dhomat e Specializuara në Hagë në seancën e sotme ka nisur dëgjimi i dëshmitarit të pestë në gjykimin ndaj ish-krerëve të Ushtrisë Çlirimtare të Kosovës (UÇK). Dëshmia e të njëjtit ka filluar në sesion privat.

Pas një pauze 40-minutëshe, kryetari i trupit gjykues, Charles L. Smith pasi është kthyer në sallë, ka njoftuar se për të mbrojtur dëshmitarin do të vazhdojnë në seancë private.

“Kalojmë në seancë private, kjo bëhet për ta mbrojtur dëshmitarin”, ka thënë ai.

Gjatë ditës së sotme , dëshminë e ka përfunduar pranë Gjykatës Speciale dëshmitari i katërt, i cili i është përgjigjur pyetjeve të mbrojtjes së Rexhep Selimit dhe Jakup Krasniqit, të cilat po ashtu janë dëgjuar në seancë të mbyllur për publikun, ashtu siç nuk janë dëgjuar as edhe pyetjet e bëra nga ZPS-ja.

Gjykimi ndaj ish-krerëve të UÇK-së ka nisur më 3 prill me deklaratat hyrëse të palëve.

Para trupit gjykues, Thaçi, Veseli, Selimi dhe Krasniqi janë deklaruar të pafajshëm për akuzat për krime të pretenduara të luftës. Ata ndodhen në qendrën e paraburgimit në Hagës prej nëntorit të vitit 2020./KSP

10:16

Në seancë të mbyllur për publikun mbrojtja e Selimit po e merr në pyetje dëshmitarin e katërt

Gjykimi ndaj ish-krerëve të Ushtrisë Çlirimtare të Kosovës (UÇK) në Dhomat e Specializuara të Kosovës në Hagë është duke vazhduar me marrjen në pyetje të dëshmitarit të katërt nga mbrojtja e të akuzuarit Rexhep Selimi.

Edhe të mërkurën seanca është duke u zhvilluar e mbyllur për publikun.

Deri më tani të gjithë dëshmitarët në këtë proces kanë dhënë dëshmitë e tyre në seanca kryesisht të mbyllura për publikun.

Ish-presidenti Hashim Thaçi, ish-kryeparlamentarët Kadri Veseli e Jakup Krasniqi, si dhe ish-shefi i deputetëve të Vetëvendosjes, Rexhep Selimi, akuzohen për ndërmarrje të përbashkët kriminale lidhur me vrasje, tortura e trajtim mizor në rreth 40 qendra ndalimi në periudhën 1998–1999.

Për këto krime të pretenduara, ZPS-ja pretendon se katër pjesëtarët e Shtabit të Përgjithshëm ishin në dijeni ose kanë pasur arsye të jenë në dijeni.

Ata akuzohen edhe për pjesëmarrje direkte në frikësim, marrje në pyetje dhe keqtrajtim të të ndaluarve nëpër qendra ndalimi. Akuzat i kanë mohuar në tërësi Thaçi, Veseli, Selimi e Krasniqi, e po ashtu edhe mbrojtësit e tyre.