Cakolli: Dorëheqjet e kryetarëve në veri, rrugëdalja që do të ndiqet nga institucionet
Eugen Cakolli nga Instituti Demokratik i Kosovës ka thënë se duke marrë parasysh rrethanat aktuale dhe presionin e madh ndërkombëtar, rrugëdalja që do të ndiqet nga institucionet e Kosovës, sipas tij, do të jetë dorëheqja kryetarëve shqiptarë të katër komunave veriore të cilët fituan në zgjedhjet e 23 prillit, proces që u bojkotua nga serbët.
Cakolli ka thënë se është evidente që zgjedhjet në katër komunat e veriut do të mbahen, por është i pasigurt se cili opsion ligjor do të ndiqet për t’i mbajtur ato.
“Duke marrë parasysh kushtet aktuale dhe presionin e madh ndërkombëtar, dorëheqjet janë rrugëdalja që do të ndiqet nga institucionet. Është e qartë që kryetarët e rinj praktikisht e kanë të pamundur ta çojnë deri në fund mandatin”, ka thënë Cakolli në “60 Minuta” të KTV-së.
Sipas tij, është çështje kohe dhe modaliteti se kur do të shpallën zgjedhjet e reja në ato komuna, derisa thotë se dorëheqjet janë opsioni më i lehtë procedural.
“Nëse kryetarët japin dorëheqje, zgjedhjet mund të mbahen për 30-45 ditë. Nëse nuk japin dorëheqje dhe ndiqet rrugëdalja ligjore me peticion për largimin e këtyre kryetarëve, nuk do të kishte proces zgjedhor para vjeshtës. Dorëheqjet janë opsioni më i lehtë procedural, por duke ditur se mund të ketë prapë bojkotim do të ishte mirë ta provojmë modalitetin e demokracisë së drejtpërdrejtë me peticion. Problemi me këtë opsion është edhe kostoja. Duhet 4-6 muaj për t’u mbyllur si cikël dhe duhet të marrin pjesë së paku 50% të atyre që kanë të drejtë vote. E shoh më të komplikuar, ndonëse e nevojshme”, ka shtuar Cakolli.
Megjithatë, ai beson se edhe me dorëheqje, serbët do të merrnin pjesë në zgjedhje, veçanërisht pasi siç thotë Cakolli, është njëra nga kërkesat e ndërkombëtarëve.
Aleatët perëndimorë e bënë Qeverinë e Kosovës fajtore për tensionimin e situatës në veri të vendit.
Reagimet ndërkombëtare erdhën pas aksioneve të Policisë së Kosovës, më 26 maj, në tri komunat në veri të Kosovës, Zubin-Potok, Zveçan dhe Leposaviq, për të siguruar qasjen në objektet komunale të kryetarëve të ri të këtyre tri komunave.
Përshkallëzimi në veri kulmoi të hënën, më 29 maj, kur trupat paqeruajtëse të KFOR-it ndërhynë në Zveçan “për të shmangur përplasjet mes palëve dhe për të minimizuar rrezikun e përshkallëzimit”, dhe u sulmuan nga disa protestues të dhunshëm, që qeveria e Kosovës thotë se ishin “banda kriminale serbe”.
Nga kjo përleshje që ndodhi, 30 ushtarë të KFOR-it u lënduan.
Në dy ditët e fundit, situata është më e qetë, ndërsa janë paralajmëruar se shumë shpejt mund të ketë zgjedhje të reja.
Përfaqësuesi i Lartë i BE-së për politikë të jashtme, Josep Borrell, ka njoftuar të enjten tri kërkesat për Qeverinë e Kosovës.
“Zgjedhje lokale të reja të menjëhershme, sigurimi i pjesëmarrjes së serbëve të Kosovës, nisja e punës për themelimin e Asociacionit të komunave me shumicë serbe brenda dialogut të ndërmjetësuar nga BE-ja”, janë tri kërkesat e parashtruara.
