ZPS-ja s’përgatiti dëshmitar tjetër, paralajmërohet për sanksione
Kryetari i trupit gjykues të Dhomave të Specializuara, Charles Smith, i ka tërhequr vërejtjen dhe i ka paralajmëruar sanksione ZPS-së, pasi që nuk ka siguruar një dëshmitar tjetër gjatë seancës gjyqësore të së enjtes, në të cilën e përfundoi dëshminë dëshmitari i nëntë
Kryetari i trupit gjykues të Dhomave të Specializuara, Charles Smith, e ka paralajmëruar të enjten Zyrën e Prokurorit Special (ZPS) se mund të përballet me sanksione, shkaku që nuk ka përgatitur dëshmitar tjetër në procesin gjyqësor, në të cilin po gjykohen ish-udhëheqësit e Ushtrisë Çlirimtare të Kosovës (UÇK).
Në seancën e së enjtes ka përfunduar dëshminë dëshmitari i nëntë i Prokurorisë.
Smith ka thënë se është në përgjegjësi të ZPS-së që të paraqesë dëshmitarë të rinj. Në mungesë të dëshmitarit tjetër, seanca e së enjtes është përmbyllur në mesditë, ani se parashihet që të zgjasë deri pasdite dhe që pas përfundimit të dëshmisë së një dëshmitari të dëgjohet dëshmitari tjetër.
“Në këtë moment të gjykimit, vetëm një organizatë është përgjegjëse për të thirrur dëshmitarë dhe ajo është ZPS-ja... ZPS-ja ka bërë një shkelje të drejtpërdrejtë të urdhrit të trupit gjykues sa i takon zhvillimit të procedurës. Ky është një paralajmërim i parë ndaj ZPS-së, një shkelje e dytë do të konsiderohet për marrje sanksionesh”, ka theksuar Smith.
Ai ka shtuar se edhe në rast se një prej dëshmitarëve të propozuar nuk është në gjendje që të dëshmojë sipas kalendarit apo nëse nuk ka kundra-pyetje për dëshmitarin ose nëse kundër-pyetjet zgjasin më pak nga që pritej, atëherë pala thirrëse duhet që të sigurohet të ketë një dëshmitar alternativ. Smith ka shprehur edhe shqetësimin për kohëzgjatjen e procesit gjyqësor të ish-presidentit të Kosovës, Hashim Thaçi, ish-kryeparlamentarëve Jakup Krasniqi e Kadri Veseli, dhe ish-shefit të Grupit Parlamentar të Lëvizjes Vetëvendosje (LVV), Rexhep Selimi. Ai ka kërkuar që procesi të zhvillohet shpejt dhe drejt.
“Të gjithë këta njerëz dhe katër të akuzuarit që po mbahen në paraburgim janë në pritje të dëshmitarit të radhës në mënyrë që kohën ta përdorin në mënyrë të përgjegjshme. Ky trup gjykues e ka marrë shumë seriozisht përgjegjësinë e vet për të mbrojtur të drejtat e të akuzuarve për një gjykim të shpejtë dhe të drejtë”, ka thënë ai.
Thaçi, Krasniqi, Veseli e Selimi janë duke u mbajtur në paraburgim prej 2 vjet e 7 muajsh. Ata akuzohen nga Prokuroria Speciale për ndërmarrje të përbashkët kriminale lidhur me vrasjet, torturat dhe trajtimin mizor gjatë periudhës së viteve 1998-1999. Në aktakuzën e konfirmuar në shkurt të 2023-tës, ata ngarkohen se kanë marrë pjesë drejtpërsëdrejti në frikësimin, marrjen në pyetje dhe keqtrajtimin e të ndaluarve nëpër qendra ndalimi në Kosovë dhe në Shqipëri. Aktakuza i përfshin mbi 400 viktima të mbajtjes në qendra ndalimi, mbi 100 vrasje dhe 20 të zhdukur me dhunë.
Gjykimi ndaj Thaçit, Veselit, Krasniqit e Selimit ka nisur në fillim të prillit dhe i kanë mohuar akuzat, ndërsa mbrojtja e tyre, në shpalosjen e fjalës hyrëse, ka pretenduar se UÇK-ja nuk ka pasur organizim hierarkik të atillë që parashihte që anëtarët e Shtabit t’i kontrollonin zonat operative dhe komandat lokale.
