Gjykata e Apelit ka konfirmuar vendimin e Gjykatës Themelore në Prishtinë për pafajësinë e ish-ministrit të Shëndetësisë, Ferid Agani, dhe ish-sekretarit të kësaj ministrie, Gani Shabani, në rastin “Stenta 1”.
Në një vendim të publikuar nga Apeli, bëhet e ditur se është refuzuar si e pabazuar ankesa e Prokurorisë Speciale. Apeli ka vlerësuar se aktgjykimi i Themelores nuk përmban shkelje esenciale të dispozitave dhe se s’ka kundërthënie në vetvete e as me arsyet e tij.
Apeli ka vlerësuar se është vepruar drejt kur Agani e Shabani janë liruar për veprën penale “keqpërdorim të pozitës apo autoritetit zyrtar”.
Në gusht të vitit të shkuar, Themelorja pati liruar të dy nga akuzat. Në fjalën përfundimtare, Prokuroria pati ndryshuar dispozitën e aktakuzës duke thënë se dëmi i pretenduar nuk ishte 4 milionë e 555 mijë e 553 euro, por 11 mijë e 450.
Ky rast penal është njëri nga rastet e shënjestruara për liberalizim të vizave i koduar me emrin ‘Stenta’.
Ish-ministri i Shëndetësisë, Ferid Agani dhe Gani Shabani, ishin shpallur fajtorë për keqpërdorim të pozitës zyrtare, në prill të vitit 2019. Por pas ankesave, ky aktgjykim ishte anuluar nga Gjykata e Apelit në dhjetor të vitit 2019 dhe lënda ishte kthyer në rigjykim në shkallë të parë.
Për shkak të numrit të madh të të akuzuarve në shkurt të vitit 2018 rasti ‘Stenta’ u nda në tri pjesë, të akuzuarit Agani dhe Shabani gjykohen veçmas në rastin ‘Stenta 1’, mbi 40 mjekë të spitaleve publike akuzohen në rastin e njohur si ‘Stenta 2’, ndërsa pronarët dhe mjekë të spitaleve private janë pjesë e rastit ‘Stenta 3’.
Prokuroria e Shtetit, më 15 qershor 2016, kishte ngritur aktakuzë kundër Ferid Aganit, Gani Shabanit dhe 62 personave të tjerë, për veprat penale “keqpërdorimi i pozitës apo autoritetit zyrtar”, “marrje e ryshfetit”, “dhënie e ryshfetit”, “trajtim i pandërgjegjshëm mjekësor”, “ushtrim i kundërligjshëm i veprimtarisë mjekësore dhe farmaceutike” dhe “shmangie nga tatimi”.
© KOHA. Të gjitha të drejtat janë të rezervuara.
