Presidenti serb Aleksandar Vuçiq ka thënë se Serbia shpalli ditë zie edhe për policin e Kosovës të vrarë nga sulmuesit serbë në Banjskë të Zveçanit.
“Serbia shpalli ditë zie edhe për serbët e vrarë edhe për policin e vrarë. Për mua serbët e vrarë nuk do të jenë kurrë terroristë, për mua nuk ka justifikim as vrasja e një polici”, ka thënë Vuçiqi, shkruan Rts.
“Sigurisht që përgjegjësia duhet mbajtur për këtë, por vrasja nuk ishte e planifikuar”, thekson Vuçiq. "Siç qëndrojnë gjërat, ata vendosën barrikada, jo kurthe. Polici ka mbetur i plagosur pasi ka përplasur telat dhe eksplozivët që janë përdorur për lidhjen e automjeteve dhe vendosjen e barrikadave".
Më pas ka pasur shkëmbim zjarri, ka thënë Vuçiq.
“Kjo nuk e zvogëlon peshën e aktit, por shpjegon natyrën dhe qëllimet”, ka shtuar ai. “Jemi të tronditur nga reagimi i EULEX-it. Ata thonë se ishte një aksion i koordinuar i KFOR-it, EULEX-it dhe policisë së Kosovës, ata e dinin se kë po dërgonin në aksion. Ata e refuzuan EULEX-in dhe filluan të likuidojnë të gjithë serbët”.
Kjo deklaratë e tij vjen pas kritikave të shumta edhe ndërkombëtare, të cilat thonë se me shpalljen ditë zie në Serbi për sulmuesit serbë, tregohet se Serbia ishte prapa sulmeve.
Në pamjet me dron të publikuara nga Qeveria e Kosovës është parë se pjesë e grupit sulmues ishte edhe nënkryetari i Listës Serbe është edhe Milan Radojiçiq.
Ai ka thënë se Milan Radojiçiq nuk është i plagosur, por do të merret në pyetje.
“Milan Radojiçiq nuk i ka fshehur asnjëherë rolet e tij, ai është në territorin e Serbisë qendrore, nuk është i plagosur dhe do të merret në pyetje, ai është një njeri që e konsideron veten luftëtar për liri, por ka pyetje të cilave duhet t'i përgjigjet”, ka thënë Vuçiqi.
Kryeministri i Kosovës, Albin Kurti, ka akuzuar Serbinë se është përgjegjëse për organizimin e një grupi serbësh të armatosur.
Ministri i Punëve të Brendshme të Kosovës, Xhelal Sveçla, sot ka njoftuar se njëri nga tre sulmuesit e armatosur serbë, të vrarë në aksionin e Policisë së Kosovës në Banjskë të Zveçanit të dielën, është truproje e shefit të Agjencisë së Inteligjencës në Serbi (BIA), Aleksandar Vulin.
Vuçiqi ka thënë se kjo deklaratë e Sveçlës është gënjeshtër."Gjithçka që thanë ishte gënjeshtër. Ata e përdorën këtë në mënyrën më të ndyrë”, ka thënë ai.
“Unë po i kërkoj komunitetit ndërkombëtar të mos bëjë presion mbi Beogradin, ata e dinë se kush është fajtor për këtë. Çka t'u them serbëve, kur kanë tre bashkëkombës të vrarë, do të pyesin pse nuk keni ndërhyrë”, thotë Vuçiq. “Unë po i kërkoj komunitetit ndërkombëtar që të mos i bëjë presion Beogradit, ata e dinë se kush është fajtori për gjithë këtë”.
Duke folur për serbët e arrestuar, ai tha se paraburgimi i tyre do të zgjasë për aq kohë sa t'i pëlqejë Kurtit.
“Serbia është fajtore – për çfarë saktësisht”, ka pyetur ai.
Ai ka shtuar se njëqind herë ka thënë se po provokojnë zemërimin e popullit serb dhe se janë në prag të kryengritjes.
I pyetur se si është komunikimi ndërmjet ushtrisë serbe dhe komandës së KFOR-it, Vuçiq është përgjigjur se është i saktë dhe se gjenerali Ristuça është njeri serioz.
Ai ka përmendur se nuk e di nëse është reale që KFOR-i të marrë përsipër mbrojtjen në veri dhe se këtë nuk mund ta premtojë.
Të dielën e 24 shtatorit nga sulmues të armatosur në Banjskë të Zveçanit ka mbetur i vrarë polici Afrim Bunjaku dhe janë plagosur tre të tjerë, njëri prej tyre me armë zjarri. Edhe tre sulmues janë vrarë nga aksioni pasues i Policisë së Kosovës, ndërkaq tetë janë arrestuar. Deri tash tre janë dërguar në paraburgim e katër janë liruar. Është kapur edhe arsenal armësh, ndërsa disa sulmues të tjerë tashmë kanë ikur e po trajtohen në spitalet e Serbisë.
© KOHA. Të gjitha të drejtat janë të rezervuara.
