Rusia po tenton t’u përgjigjet sanksioneve perëndimore duke miratuar një ndalim eksporti që përfshin më shumë se 200 produkte dhe kjo masw do të zgjasë deri në fund të vitit.
Një listë e detajuar nuk është publikuar ende, por agjencia shtetërore e lajmeve TASS tha se lista përfshin pajisje teknike, telekomunikuese dhe mjekësore si dhe vetura, makineri bujqësore, lokomotiva dhe vagonë.
BBC-ja raporton se ndalimi i eksportit ka për qëllim rreth 48 vende që qeveria ruse thotë se kanë "kryer veprime armiqësore" kundër Rusisë. Qeveria shtoi se ndalimi "ka për qëllim sigurimin e funksionimit të qetë të sektorëve kryesorë të ekonomisë" në Rusi.
Duket se kjo lëvizje tashmë ka efekt, pasi gjiganti francez Stellantis në një prononcim për Carscoops, ka thënë se ka ndërprerë importin dhe eksportin e veturave nga Rusia.
Kompania operon me një fabrikë në Kaluga dhe në fillim të këtij viti filloi të eksportojë Citroen Jumpy, Peugeot Expert dhe Opel Vivaro në vendet e Evropës Perëndimore. Kjo është një goditje e madhe për Stellantis, sepse, siç raportoi më parë Reuters, gjigandi evropian i automobilave donte ta kthente fabrikën në Kaluga në një "qendër eksporti të motorëve dhe veturave për Evropën, Amerikën Latine dhe Afrikën e Veriut".
Hyundai, që së bashku me markën Kia menaxhon disa objekte prodhimi në Rusi, ka vendosur gjithashtu të pezullojë operimet në këtë vend.
"Hyundai Motor Company është thellësisht i shqetësuar për situatën në Ukrainë", tha prodhuesi jug-korean i veturave në një deklaratë për Carscoops.
"Ne mund të konfirmojmë se operacionet e Hyundai Motor Manufacturing Russia (HMMR) janë pezulluar deri në njoftimin e mëtejshëm për shkak të problemeve aktuale globale të logjistikës me shpërndarjen e komponentëve. Siguria e punonjësve tanë dhe kujdesi ndaj klientit mbetet prioriteti ynë kryesor. Ne sinqerisht shpresojmë se situata do të zgjidhet në mënyrë paqësore, sa më shpejt të jetë e mundur", thuhet në deklaratë.
Ndërkohë zyrtarët rusë po kërcënojnë të shtetëzojnë asetet e kompanive që janë tërhequr nga vendi. \autoblog
© KOHA. Të gjitha të drejtat janë të rezervuara.
