Oliver Blume, shefi ekzekutiv i Porsches dhe tash edhe shef ekzekutiv i Volkswagenit, ka thënë se dëshiron t’i përmbahet planit të elektrifikimit, dhe nëse ka mundësi, ta përshpejtojë atë.
Shefi i ri i VW-së ka thënë se prodhuesit i duhet të gjejë ritmin e duhur për të bërë kapërcimin drejt veturave elektrike.
“Jam adhurues i mobilitetit elektrik dhe qëndroj në këtë rrugë... Do të vazhdojmë me shpejtësinë aktuale, e ku të mundemi, do ta përshpejtojmë”, ka thënë ai në një takim së fundmi me menaxherët botërorë të kompanisë, ka shkruar Reuters.
Në qershor ishte raportuar se Volkswageni synon ta tejkalojë Teslan për shitje të veturave elektrike në 18 muajt e ardhshëm. Kompania pret që sivjet t’i shesë rreth 800 mijë njësi, e më 2023 1.3 milionë të tjera për të ngushtuar dallimin me Teslan që pritet të shesë sivjet 1.5 milionë vetura elektrike.
Prodhuesi amerikan megjithatë po ndërton fabrika gjithandej botës dhe nuk duket se e ka në plan të ndalet.
Megjithatë, VW-ja po ia del më mirë se rivalët tjerë në rrugën e kthimit drejt veturave elektrike. Dëshmi për këtë është rritja e shitjeve dhe përfitimeve që po ia sjellin kompanisë. Por mbetet në dilemë nëse qëllimi për të tejkaluar Teslan deri më 2025 do të arrihet.
© KOHA. Të gjitha të drejtat janë të rezervuara.
