Grupi Volkswagen në Amerikë ka nënshkruar marrëveshje me kompaninë kroate të veturave, Rimac, për të importuar dhe shpërndarë veturat e brendit në Shtetet e Bashkuara. Sascha Doering, që është shef operativ në Buggati America, ka zgjeruar rolin për ta përfshirë edhe Rimacun.
Marrëveshja u nënshkrua më herët në shtator, por tek tash është bërë e ditur nga Volkswageni. Kompanitë planifikojnë një rrjet për shitjen e veturave kroate në SHBA.
“Për të dyja brendet, Bugatti dhe Rimac, SHBA-ja është tregu më i fuqishëm në botë, andaj është e rëndësishme që të sigurojmë përvojë shitjeje që u përshtatet veturave tona të mrekullueshme që ua ofrojmë klientëve”, ka thënë Mate Rimac, shefi ekzekutiv i Bugatti Rimacut.
Grupi Volkswagen në Amerikë më herët ka bërë shitjen e veturave të Bugattit në SHBA. Kjo ndryshoi kur Bugatti iu bashkua Rimacut.
Bashkimi Bugatti Rimac ndodhi në vitin 2021. Zyrat e kompanisë janë në Kroaci. Prodhimi i Bugattit ndërkohë vazhdon në Francë. Porsche ka nën pronësi 45 për qind të kompanisë ndërsa 24 për qind të Rimacut.
© KOHA. Të gjitha të drejtat janë të rezervuara.
