Infektimet me koronavirus në Angli kanë rënë për rreth një të tretën gjatë izolimit, sipas një studimi.
Disa nga zonat më keq të goditura janë përmirësuar më së shumti – por, pa i marrë parasysh përparimet, rastet kanë mbetur relativisht të larta përreth Anglisë.
Sekretari i Shëndetësisë, Matt Hancock, ka thënë se të dhënat kanë treguar se vendi “ende nuk mund të na i heqë këmbën nga pedalja”.
Gjetjet nga Kolegji Perandorak i Londrës janë bazuar nga testet PCR te më shumë se 100,000 njerëz prej 13 deri më 24 nëntor.
Studimi “React-1” është i vlerësuar lart dhe jep pamjen më të fundit të të dhënave për Covid-19 në vend.
Rënie e ngadalshme
Studiuesit kanë vlerësuar se shkalla e riprodhimit të virusit ka rënë në 0.88. Kjo kur përkthehet mesatarisht çdo infeksioni më pak se një infeksion i ri, kështu që pandemia po tkurret.
Udhëhequr së bashku me kompaninë e anketimeve Ipsos MORI, në studim është përfshirë testimi i mostrave të atypëratyshme të njerëzve me koronavirus, qoftë kur kanë pasur simptoma apo jo.
Rezultatet e këtyre testeve kanë sugjeruar një rënie prej 30 për qind të infektimeve mes studimit të fundit dhe periudhës së 13-24 nëntorit.
Para kësaj, rastet ishin duke u rritur – duke u dyfishuar çdo nëntë ditë kur studimi kishte raportuar së fundmi në fund të tetorit.
Tani rastet janë duke rënë, por më ngadalë sesa që janë rritur – duke u përgjysmuar përafërsisht çdo 37 ditë.
Sidoqoftë, në veriperëndim dhe verilindje – rajone me numrin më të lartë të rasteve – infektimet kanë rënë më shumë se gjysmë.
Gjetjet sugjerojnë se rastet tani janë më të larta në lindje dhe perëndim.
Izolimi hyri në fuqi në Angli më 5 nëntor, por të dhënat kombëtare, të bazuara në njerëzit me simptoma, sugjeruan se rastet ishin në kulm pas një jave.
Kjo kishte ardhur për shkak të socializimit para izolimit, pasi duhen mesatarisht pesë ditë pasi e merr virusin që të mund të vërehet nga një test.
Pa marrë parasysh përparimet, rastet në përgjithësi qëndrojnë të larta.
Një në 100 njerëz kanë koronavirus – dyfishi i shkallës së shtatorit kur infektimet filluan të rriten.
Studimi gjithashtu zbuloi se grupe të caktuara kishin pasur mundësi më të larta për të dalë pozitivë gjatë kësaj periudhe: Njerëzit me etni aziatike, njerëzit që jetojnë në lagjet më të varfra dhe njerëzit që jetojnë në shtëpi më të mëdha.
Nga kjo kanë ardhur në përfundim se: përafërsisht 96 njerëz në çdo 10,000 njerëz kishin koronavirusin, nga 132 për 10,000 sa ishte para karantinës.
Ishin rreth 72,000 infektime të reja në ditë, krahasuar me 100,000 në fund të tetorit.
Shenja inkurajuese
Profesori Paul Elliott, që e udhëheq studimin, ka thënë se të dhënat kanë ofruar “shenja inkurajuese” për epideminë në Angli.
“Këto prirje sugjerojnë se qasja me nivele ka ndihmuar që të frenohen infektimet në zonat e ndikuara më së shumti dhe se izolimi ka ndikuar këtu.
Por ai ka thënë: “Përderisa po i afrohemi një kohe sfiduese të vitit, është ende jetësore që nëpërmjet veprimeve dhe sjelljeve tona të gjithë ne të bëjmë pjesën tonë për ta mbajtur virusin sa më larg”.
Ai ka thënë për programin “Today” të BBC Radio 4 se është e rëndësishme për të vazhduar me mesazhet e shëndetit publik, përderisa rastet vazhdojnë të jenë të larta.
“Është shumë e rëndësishme që duke iu afruar Krishtlindjeve ta mbajmë virusin në kontroll”, ka shtuar ai.
Profesori Kevin McConway, profesor i statistikave në Universitetin e Hapur, ka kërkuar kujdes për shifrat.
Ai ka thënë: “Gjërat kanë filluar ta marrin drejtimin e duhur përsëri, por nuk jemi në pozitën që kemi qenë në fund të verës apo madje edhe në fillim të verës. Duhet ende të jemi shumë të kujdesshëm”.
“Vendimtar”
Qeveria ka sugjeruar se sistemi i ri i niveleve në Angli, që ka hyrë në fuqi të mërkurën, mund të jetë “vendimtar” për ta vazhduar uljen e infeksioneve.
Sistemi me tri nivele është më i ashpër sesa ai i ngjashmi që ishte vendosur para 5 nëntorit, ku gjatë asaj kohe rastet filluan të rriten.
Rajonet do të jenë të ndara në tri nivele: të mesme, të larta dhe shumë të larta.
Në përgjithësi, 99 për qind e Anglisë, do të hyjë në dy nivelet më të larta, me masa të ashpra në kafene dhe restorante dhe ndalimin për t’u mbledhur në shtëpi. Vetëm Cornwall, Ishulli i Wightit dhe Ishulli i Scillyt do të jenë në nivelin më të ulët.
Gjetkë në Mbretërinë e Bashkuar, Irlanda Veriore ka filluar dy javë ndërprerje të izolimit, përderisa në Skoci secila zonë është ndarë në një nga pesë nivelet.
Në Uells, ministri i parë, Mark Drakeford ka thënë që kafenetë, restorantet dhe baret do të jenë në cak për masa më të ashpra – që ende nuk janë përfunduar – përderisa po u afrohemi Krishtlindjeve.
Ato do të hyjnë në fuqi nga e premtja, më 4 dhjetor.
Këto gjetje nga studimi “React-1” janë të përkohshme, që do të thotë se ende duhet të rishikohen.
© KOHA. Të gjitha të drejtat janë të rezervuara.
